Chelsea an chelh; Magpies sum senin awmzia a nei lo

Nilaini zan khan Premier League inkhel pahnih a awm a, Watford khelmuala lenglut Chelsea-in goal an khung thei lo a, khualmualah Watford nen 0-0 in an inhnehtawk.

January transfer-a sum hmang hnem Newcastle United sum senin awmzia a nei thui lo. Khualmualah Everton lenchilhin goal thum an chhuah a, Merseyside club hian 3-0 in hnehna an chang.

Watford vs Chelsea

Guus Hiddink-a enkawlna hnuaiah Chelsea-in Premier Lea-gue match sarih an hmachhawn tawh a, tlawm hmel an la hmu lo.

Blues tan striker Diego Costa-a'n a hun ṭha neih a chhawr ṭang-kai thei lo a, first half-ah goal post sir chiaha a pet hnuin second half-a a tauh goal ngei tur nia lang chu Watford keeper Heurelho Gomes-a'n a lo dan sak.

Chelsea keeper Thibaut Courtois chu hna nei lo tawp a ni bik lo a, Etienne Capoue pet goal ngei tur nia ngaih chu ṭha takin a dang a, Watford captain Troy Deeney-a'n a hun ṭha neih a chhawr ṭangkai lo bawk.

Khel ṭha Gomes

Vicarage Road-a inkhelah Wat-ford keeper Heurelho Gomes a langsar a, Tottenham Hotspur keeper hlui hian Costa bakah Oscar, Willian, Branislav Ivanovic leh John Obi Mikel-te pet goal tur chu ṭha tak takin a dan sak.

Inkhelh zawhah Brazilian keeper chuan, "Keeper tan chuan goal lut tur dan hi kan hna a ni a, team ṭha tak laka point kan hlawh chhuah theihna tura ka khelh ṭhat avangin ka hlim a ni," a ti.

Costa bawk

Spain international Diego Costa hi khelmual chhunga a che tla vel en chuan a thiam tih phat rual a ni lo a, chumi rual chiaha hmuh hmaih theih loh erawh a nungchang hi a ni.

Watford defender Sebastian Prodl nen an intihbuai avangin referee Mike Dean a inrawlh a ngai a, Juan Carlos Paredes nen an inhnial buai avangin yellow card pek a ni bawk.

Mahse, Chelsea manager lailawk Guus Hiddink chuan Costa hi chhanin, "Ka mita chiang taka ka hmuh chu Paredes khan hnung lam aṭangin Costa kha a bei a, thinrim lohna chi a ni lo. Ka player hi ka chhan inti a nih pawn a awm lo hran lo, dik lo taka beih a nih miau vangin ka chhan a ni," a ti.

Dutch manager chuan a striker chuan insiamṭhat a mamawh tih a pha lo a, "Premier League-ah hian tharum an hmang nasa a, lehlam pawl khelh dan a enin Costa hian tharum hman ve mai a duh ṭhin a ni. Mahse, danin a phal chin bak chuan kan che tur a ni lo a, inzir a ngai a ni," tiin a striker chuan inzir a mamawh thu a sawi.

Terry khawiah nge?

Kum 14 lek a nih laia Chelsea zawmtu John Terry-a'n Pathianni khan Stamford Bridge a chhuahsan tur thu a puang a, English defender hian contract thar Chelsea-in an zawrh loh thu a sawi.

Blues captain thusawi hian football khawvel titi a luah nghal a, Chelsea fan-te'n hun harsaa khai chhuaktu an club captain kal chhuak tur hi an ngaithiam lo.

Vicarage Road-a inkhel
ṭan a nih hmaa Terry hming lam a nih laiin Stadium chhungah mipui thawm a ṭha a, banner tam tak karah "Captain, Leader, Legend" tih intar chu a langsar hle.

Chelsea manager Hiddink chuan inkhelh zawhah, "Tun season hi han zo phawt se, a hmalam hun chu amah leh club kuta awm a ni," tiin Terry chungchang a sawi.

Magpies an zawr

December 26-a 1-0 a Newcastle United an hneh hnua Premier League match-a chak hmel la hmu leh lo Everton-in chak hmel an hmu ve ta a, an khelmualah Magpies chu 3-0 in an hneh.

Toffees tan Aaron Lennon chuan minute 23-naah goal hmahruai a khung a, Ross Barkley chuan hun tawp dawn hnaih lamah penalty
vawi hnih chhuih lutin inkhelh chhung zawngin khelmual chhungah a hmuhnawm.

January transfer-a pound mak-taduai 29 seng Magpies pla-yer lakluh thar zingah Andros Town-send inlan mah se beisei a phak lo a, Ivory Coast forward Seydou Doumbia-a'n substitute bench-ah hun a hmang tluan bawk.

Eng nge an sawi?

Everton manager Roberto Martinez chuan, "Kan hun tawn harsa tak aṭang khan kan inzir a ni. A chang chuan kan khingpuiten awlsam taka goal rawn khung mai chang an nei ṭhin a, vawiinah erawh kan khel ṭha takzet a ni," tiin a naute khelh danah a lawm hle.

Newcastle manager Steve McClaren chuan, "First half-ah kha chuan Everton player-te kha an talbuai tih kan hmu a, remchanga kan hmang thei lo erawh kan thiam loh a ni. Kan player tam zawkin an theihna angin an khel chhuak lo a, fans 50000 chuang pungkhawm hmaa khelh dan turah chuan a chhuanawm lo hle a ni," tiin a naute khelh danah a lawm loh thu a sawi.