UCL squad-ah Falcao tel ve lo

Chelsea chuan Champions League knockout stage khel thei tur an player 25 hming an tar chhuak a, loan-a an hawh mek striker Radamel Falcao hming a tel ve lo.

Colombia international hian a malpuiah hliam a neih avangin October thla hnuah a club tan a la inkhel leh miah lo a, ani aiah hian Janaury transfer laia loan-a an lakluh Alexandre Pato hming a lang thung.

AC Milan forward hlui Pato hian kar hmasa khan Corinthians aṭangin Premier League champion hi a zawm a ni.

Chelsea manager lailawk Guus Hiddink chuan Pato bakah hian a player thar Matt Miazga chu Champions League leh Premier League squad-ah a telh bawk.

United States defender Miazga hian kar hmasa bawk khan New York Red aṭangin kum li leh a chanve cham turin Chelsea hi a zawm a ni.

Falcao hian French Ligue 1 club Monaco aṭang season khat chhung cham tura Stamford Bridge a zawm a, mahse beisei angin a khel chhuak thei lo. A club tan hian vawi khat chiah league match-ah inkhel bul a la ṭan phak a ni.