Engvangin nge footballer ṭha te'n China an pan?

Kum 2007-a Los Angeles Galaxy-in David Beckham an lakluh khan Major League Soccer-in ngaihven a hlawh zui nghal a, world class footballer ni ṭhin ten USA lam hawiin an puanthuah an tel. Mahse, MLS hian ngaihven hlawh tho mah se world class footballer uai thla tawh lam an lakluh tlangpui avangin football khawvelah inelna sang tak anga thlir a ni lo.

MLS hnuah Chinese Super League a lo lang a, khawvelin a ngaihvenna hmasa chu kum 2012-a Chelsea striker hlui Nicolas Anelka leh Didier Drogba-te'n Shanghai Shenhua an pan kha a ni a, kum 2012-ah vek Borussia Dortmund tan vawi 101-a inlana goal 49 khungtu Lucas Barrios-a'n Guangzhou Evergrande a pan khan titi a ti tam hle bawk.

Hun a kal a, kum 2016 a thlen meuh chuan January transfer bazar-ah Chinese Super League hming a langsar a, footballer an vanglai hmang mek Jackson Martinez leh Ramires-te'n pawisa tam tham tak hlawh tura China an pan avangin khawvelin zawhna a nei nghal a, chu chu khawi aṭangin nge CSL hian sum an neih? tih hi a ni.

Sum to sum

January 2016 transfer bazar a inhawng a, thawm nei na ber chu Chinese Super League an ni. Jiangsu Suning chuan Asian football transfer record thar siamin Ramires an la lut a, Chelsea midfielder hlui manah hian pound maktaduai 25 an theh chhuak.

Jiangsu Suning record hian rei a daih lo. Ni tam pawh a liam hmain Guangzhou Evergrande chuan Jiangsu record hi an rawn luahlan ve lehnghal a, Atletico Madrid striker Jackson Martinez chu pound maktaduai 31-in an la lut. Guangzhou hian Inter Milan aṭangin Fredy Guarin an la lut bawk.

CSL January transfer bazar hi hetah mai hian a tawp lo - Hebei China Fortune chuan Roma winger Gervinho leh Sevilla midfielder hlui Stephane Mbia-te an la lut a, Brazilian club ṭha tam takin hlawh tam zawk um an player-te an chhuah nual bawk.

February 26-a thlasik transfer bazar khar ve chauh tur Chinese Super League-in January transfer bazarah pound maktaduai 100 aia tam an seng tawh a, Colombian striker Radamel Falcao leh Brazilian midfielder Alex Teixeira-te chu China lam pan leh tura sawi thawm a la awm avangin an sum sen hi a la sang dawn chauh niin a lang.

Engvangin nge?

Player uaithla tawh pawh ni lo an vanglai hmang mek player-te'n Chinese Super League lam an hawi hian khawvel mak tih a hlawh a, engvangin nge football ram ropui pawh ni lo China an pan? tih hi an zawhna a ni.

An zawhna chhanna erawh awlsam taka pek theih a ni a, chu chu 'sum a tam' tih hi a ni. Chinese Super League player tam zawk hian an thiamna phu zat aia tam sum an hlawh deuh vek nia ngaih a ni.

Tun thlasik transfer-a China pantu zingah Guangzhou zawmtu Jackson Martinez hian kum khatah euro maktaduai 12 vel a hlawh dawn nia sawi a ni a, Ramires pawhin Martinez hlawh zat vel hi a hlawh dawn niin an sawi. Guarin hian euro maktaduai 7.5 vel a hlawh niin an sawi bawk.

Chinese Super League hian season hmasa khan player leh coach hlawh atan pound maktaduai 81 lai an seng a, player leh coach hlawha anni aia in seng hnem awmchhun chu Premier League chiah a ni.

Ngaihven hlawh

Chinese Super League club tam zawkin khawvel huap pawha langsar player an kawl deuh vek a, he league hian Europe-a league langsar zual Premier League, Bundesliga, La Liga leh Serie A-te em la el pha lo mah se tun ang renga an kal chuan a el pha thuai tura ngaih an ni.

Brazilian coach ropui Luiz Felipe Scolari enkawlna hnuaia khel Guangzhou-in Martinez bakah Tottenham midfielder hlui Paulinho an nei a, Hebei-in Gervinho, Shandong Luneng-in Brazil international Diego Tardelli, Shanghai Shenhua-in Guarin, Everton midfielder hlui Tim Cahill leh Chelsea striker hlui Demba Ba, Shanghai SIPG-in Ghana international Asamoah Gyan-te an kawl a, khawvel huapa hriat hlawh coach an awm nual bawk.

Scolari bakah hian England manager hlui Sven-Goran Eriksson, Brazil coach hlui Mano Menezes, Sevilla leh Atletico Madrid manager hlui Gregorio Manzano, Chelsea player hlui Dan Petrescu South Korea manager hlui Hong Myung-bo, Ac Milan, Juventus leh Japan manager hlui Alberto Zaccheroni-te chuan Chinese Super League-ah hian team an enkawl mek bawk.

Khawi aṬangin nge sum?

Nikum September thla khan Chinese Super League chuan Ti'ao Power nen TV rights-ah contract thar an ziak a, Ti'ao Power hian kum 2016-2020 chhung atan CSL hnenah hian dollar tluklehdingawn 1.25 an pe dawn.

November 2014 khan China ram president Xi Jinping chuan an ram sports economy chu 2025-ah chuan pound tluklehdingawn 596 hu vel a tlin theihna tura project an ruahman a hawng a, hei hian China ram infiamnaa sum tamzia a tarlang.