I League Under 18 Aizawl FC hmaah AIFF Academy

Nimin khan Kolkata-ah I League Under 18 group stage chu khelh zawh a ni a, semifinal-a Aizawl FC hmachhawn tur chu AIFF Elite Academy a ni.

Group A-ah AIFF Elite Academy-in hmahruaitu inchuhna inkhelah TFA chu 2-0 in an hneh a, AIFF Academy tan hian Mizo pathum Jerry Lalrinzuala, Zonunmawia leh V. Lalengzama ten starting eleven an chang. Inkhel awmze nei tawh loah Mizo tamna DSK Shivajians-in SAI Guwahati chu 6-1 zetin an sawp bawk.

Group B-ah Mizo pathum telna Pune FC in chak mamawh mah se inelna thlengtu East Bengal nen 2-2 a an in-hneh-tawk avangin semi^-final luh an beiseina chu a thamral. Goal 14 khunga top scorer ni mek Lalawmpuia telna Pune FC hi chak reng pawh ni se Goan club Salgaocar-in Mizo pali awmna Royal Wahingdoh chu 2-0 a hneh avangin a sang paliah an tel thei chuang lo.

Salgaocar-in Aizawl FC hneh lo mah se team dang pathum an hneh avangin Group B hmahruaitu an ni a, Group A pahnihna TFA Academy nen February 7, Pathianniah semifinal an khel ang. Aizawl FC-in hneh loh an tawng lo nachungin Wahingdoh leh Pune an draw avangin pahnihna an ni a, semifinal-a an hmachhawn tur chu champion tura rinkai AIFF Academy an ni.