Barcelona hmaah Valencia an mualpho

Copa del Rey semifinal first leg-ah Valencia-in tih theih an nei lo - Nilaini zan khan Nou Camp-ah Barcelona chu an lenchilh a, Luis Enrique-a naute hian 7-0 in an lo sawp.

Barcelona tan Luis Suarez chuan goal li a khung a, Lionel Messi-a'n goal thum khungin Neymar chuan penalty a pet goal lo thung.

Valencia-in thiamna lama Barcelona an phak loh tehlul nen defender Shkodran Mustafi chu chawlhlawk hmain hnawh chhuah a ni a, Gary Neville-a naute tan thawh leh ngaihna a awm tawh lo.

February 10-ah team pahnih hian second leg an khel leh dawn a, Valencia tan final lut tur chuan Barcelona laka goal riat khung a ngai tawh ang.

Ropuina ata Mualphona

Kum 1999 Champions League final kha Nou Camp-ah khelh a ni a, Manchester United leh Bayern Munich an inhmachhawn. United hi an chak dawn lo emaw tih hnuah injury time-ah goal hnih an khung a, 2-1 in an chak.

Manchester khaw club chan-china dai tawh ngai lo tur inkhelah hian Gary Neville pawh a inlan a, hetih hunlai hian kum 24-a upa chauh a la ni. Ropuina a lo tem tawhna hmunah manager angin Neville a kir a, a ropui nawn tawh lo.

Kum 40-a upa manager tan Barcelona laka an mualphona result hi a dinhmun ti der-thawng lehzualtu a ni thei. Eng-lish manager hian Valencia a enkawl hnua league match riat a hmachhawnah chak hmel a la hmu lo. Vawi nga an khingpuite inhnehtawkpuiin vawi thum a tlawm zawkah an ṭang a ni.

Valencia a enkawl hnua match 14 a kaihhruaia vawi li an chak hi Copa del Rey match-ah vek a ni a, a chet ṭhat ve berna tournament-ah a mualpho leh tak avangin Neville-a hmalam hun a eng lo hle.

Neville-a mualphona thlentu

Inkhel ṭan tir phat aṭangin Barcelona-in inkhel an thunun nghal a, minute 12 an khelh tlin meuh chuan goal hnih an khung tawh. Barcelona goal hmasa pahnih hi Luis Suarez-a khung a ni a, chawlhlawk hmain Messi chuan goal khat a khung ve leh a, vawi khat bar a pet per bawk.

Barcelona hian first half hun pek belhah penalty an hlawh chhuak bawk a, mahse Brazil captain Neymar chuan goal-ah chantir thei loin post a pet per.

Minute 58-naa Messi goal hnih khung theihna tura Suarez che vel a hmuhnawm a, Liverpool striker hlui hian mawi taka a back heel chu Messi hian lo changin a pet goal a, a career-a a goal 500 khungna chiah a ni.

Messi-a'n hat-trick a siam hnuah Suarez-a'n goal hnih dang a khung ve leh a, tun season-ah match 33 khel tawhin goal 35 a khung tling der tawh.

Neville a lawm lo

Valencia manager Gary Neville chuan Barcelona laka 7-0 laia an chak lo chu a mualpho thlak a tih thu sawiin football khawvela a hun tawn tawha la zahthlak ber a nih thu a sawi.

Manchester United defen-der hlui chuan, "Zanin chu ka mutui dawn lo a ni. Football khawvela ka thil tawn zahthlak ber ka tawng a, Valencia fan-te hian khatiang inkhel en kha an phu lo a ni," tiin an fan-te laka a inthlahrun thu a sawi chhuak.

England international hlui chuan sawi chhunzawmin, "Khaw-vela player ṭha ber pathum kan hmachhawn a, an tana hmun awl kan siamsak zat kha ka hre lo," tiin MSN chu a player-te'n an chelh ngang loh thu a sawi.

Inkhelh zawh a nih rualin Valencia fan-te'n Neville chhuak tura an duh thu social media lamah an tlangaupui nghal a, Valencia sporting director Jesus Garcia Pitarch chuan Barcelona an hneh loh chu an club chanchina an result chhiat ber ṭum a nih thu a sawi bawk.

Canizares a ṭawng chhuak

Valencia keeper hlui San-tiago Canizares chuan Barcelona laka Valencia mualpho puitu Neville chu a hna aṭanga banga fan-te hnena ngaihdam dil turin a ti!

Spanish keeper ropui ṭhin chuan, "Zanina Valencia tlawm-na kha a zahthlak a, coach hian banna thehlutin ngaihdam a dil nghal bawk tur a ni," tiin a
ṭawng na hle.

Tunge Barca dang thei?

Barcelona-in kuminah UEFA Super Cup leh FIFA Club World Cup nomawi an chawi tawh a, La Liga, Copa del Rey leh Champions League-ah beiseina sang tak an la neih bawk avangin tun season-ah nomawi panga chawi thei turin an dinhmun a ṭha hle.

Champions League last-16 a Barcelona hmachhawn tur Arsenal tan Barcelona khelh dan hi mut ti tui lo tham a ni a, Catalan club hmachhawn hi an phur lo khawp ang.

Nou Camp-ah Luis Enrique-a hming lam chungin fans an zai rual a, inkhel hmuhnawm tak chhawpchhuak ṭhintu an manager hi Barca fan-te'n an hre reng.