Serie A A zawna match 13 chak thei Juventus

Italian Serie A season kal mekah champion lai Juventus chuan a zawnin match 13 chhung hnehna an chang thei. Nilaini zan khan Genoa chu 1-0 in an hneh a, table hmahruaitu Napoli nen an inthlauhna chu point hnih a la ni zel.

Juventus Stadium, Turin-a inkhelah Juve lam hian inkhel thunun chung siin goal khung an harsat. December thla hnua a vawi khat nan winger Juan Cuadrado chuan inkhel bul a ṭan a, goal a hlawh chhuak thung.

Colombia international Cua-drado ball pet chu Genoa defender Sebastian De Mai-a'n an mahni lamah a ti lut palh a, goal dang a lut zui lo.

Juve ropuina

Season ṭan tirh khan Massimi-liano Allegri naute hian an khelh chhiat em avangin sawisel an hlawh a, manager ngei pawhin dem rawn a hlawh hman.

Amaherawhchu, 'The Old Lady' tia an sawi ṭhin Juve hian season an hmang rei tawlh tawlh a, an theihna san zia an pholang chiang tawlh tawlh. A zawna match 13 chhung league-a hnehna an chan theih hi club record thar a ni leh der tawh.

Nikum Champions League finalist hian kuminah pawh last 16 an inpet kai leh tawh a, thla leh khian German champion Bayern Munich nen an inhmachhawn dawn. Coppa Italia lamah pawh final lut tluk an ni tawh? Semifinal first leg-ah Inter Milan chu 3-0 in an sawp tawh a ni.

Juve manager Allegri chuan, "Kan senior player ṭhenkhat an inhliam avangin inkhelh zawng zawngah kan ṭhat dan berin kan inlan thei lo. Inkhelh harsa tak kara hnehna kan chan theih avangin ka lawm a, Napoli hi lehpelh kan tum avangin anni hnaih thei ang berah kan awm zel ang," a ti.

Milan chak zel

AC Milan chuan kartawpa Milan derby hautak taka hnehna an chan hnuah result ṭha an neih chhunzawm a, Carlos Bacca leh M'Baye Niang te goal khung hmangin Palermo lakah 2-0 in hnehna an chang.

AC Milan coach Sinisa Mihaj-lovic chuan, "A zawnin match hnih goal kan chhuah loh tak avangin ka lawm a, ka lawmna ti zualtu zawk chu point thum kan hlawh chhuak ṭhin hi a ni," a ti.

Milan hi inelna hrang hrangah a zawnin match sarih chhung an tlawm tawh lo a, Serie A table-ah point 39 hmuin pangana Roma chu point hnih chiahin an phak lo tawh a ni.

Inkhel dangah Inter Milan pawhin point thum an hlawh chhuak a, Mauro Icardi goal khat khung hmangin Chievo lakah 1-0 in hnehna an chang.

Argentine international Icardi hian Serie A match 109 a khelh tawh aṭangin goal 50 a khung tling ta chiah a ni.