MPL5 Qualifier Kolasib leh Champhai tan hun hnuhnung?
Mizoram Premier League Season 5-ah Aizawl khaw pawn club kan hmu dawn a nih chuan vawiinah Project Veng, Kolasib leh Champhai United te an chak a ngai a, point an hmu lo a nih erawh chuan MPL khel turin kum khat dang an nghah a ngai ang.
Vawiin hian MPL5 Quali-fier khelh chhunzawm a ni dawn a, chhun dar 12:00-ah Chhinga Veng leh Champhai United te an inkhel ang a, tlai dar 2:00-ah Ramhlun North leh Project Veng ten an chhunzawm nghal ang.
Champhai thar?
Champhai DFA aiawha MPL5 Qualifier khel Cham-phai United-in an hmingah 'united' tel mah se an match hma-sa berah an ṭangrual tawk lo. Champhai hian point an la hmu lo a, qualifier-ah mid-fiel-der Lalchhuanpuia chu hrem vangin an chhawr thei tawh dawn lo a, inhliam vangin Lal-rin-zuala a inlan thei dawn lo bawk.
Champhai coach NL Thanga chuan, "Match hmasa berah harsatna neuh neuh kan neih avangin team angin kan khel lo a, kan ṭhatna angin kan khel chhuak lo. Chhinga Veng nen kan inkhelh hunah chuan ṭha takin kan khel thei tawh ang. Kan squad a chhah ṭha a, player hrem leh inhliam vangin kan buai lo ang," tiin game ṭha zawk an khelh tur thu a sawi.
Champhai khingpui tur Chhinga Vengin an khelh
ṭhat loh niah point thum an hlawh chhuak a, Aizawl DFA cham-pion hi team ṭha tak ni mah se player mala chhuan tur an nei lo.
Chhinga Veng manager Lalthanzama Vanchhawng chuan, "Champhai inkhel kan hmu tawh a, an lian ṭha khawp mai. Keini hi chawhrualin team te ber kan ni thung a, point thum kan hmuh theih nan kan coach game plan bakah mipui ṭawiawmna a pawimawh dawn a ni," tiin Vanglaini palai a hrilh.
Kolasib tan fiahna!
MPL5 Qualifier-ah Ko-lasib-in MPL-a tawnhriat nei player an kawl hnem ber a, inpuahchahna hun ṭha nei tam tawk lo mah se Aizawl DFA aiawh club hneh thei turin an ṭha tawk. Chhinga Veng lama freekick nalh taka khungtu C. Lalnuntluanga'n MPL1-ah Chanmari tan goal thum a khung a, SYS FC tana a khelh laiin MFA Cup-ah best player a lo ni tawh bawk.
Kolasib-in C. Tluanga bakah FC Kulikawn chakna hnar ni ṭhin Lalremruata (Arapa) an kawl bawk a, ADFA First Division League pathumna Ramhlun North-in point thum hmu chiangsaa an inngaih chuan an tisual ang. Project Veng-in an match hmasa lama an chhawr loh Railways forward Hmangaihzuala leh National U16-a Mizoram champion team-a tel tawh Lalhmachhuana te an hmang thei dawn a, Ramhlun North defender Lalramthlamuana ten hna an ngah sawt ang.
Ramhlun North coach Lalruatliana Sailo (Tawia) chuan, "Champhai kan khelh
ṭuma kan buaina chu Lam-mual turf a ni a, kan khingpuite tihbuai ngai loin keimahni ringawt kha kan buai tawk. Turf hi kan hriat chian theih chuan ṭha lehzualin kan khel thei ang," tiin a sawi.
Project Veng coach Jo-seph Zoremsanga chuan, "Point thum kan mamawh a, attacking game kan khel ang. Aizawla khel kan nih avangin ṭantu an pawimawh lehzual a, Kolasib khawchhuakte min ṭawiawm turin kan sawm tak meuh meuh a ni," tiin a sawi. Kolasib coach Joseph-a hian team pumpui thlengtu bialtu MLA Zoramsangliana chungah lawmthu a sawi tel bawk.