I League Thlirlawkna Tlai dar 4:30-ah East Bengal Vs Aizawl FC

5th February, 2016

Aizawl FC-in vawiin tlai dar 4:30 hian Barasat Stadium-ah East Bengal an hmachhawn dawn a, Ten Action-ah pek-chhuah a ni ang.

MPL champion Aizawl FC-in vawi nga an khelh tawh aṭangin point li an hlawh chhuak a, an hnuaiah Salgaocar leh DSK Shivajians chiah an awm. An khingpui tur East Bengal-in match hnuhnung berah Bengaluru FC an hneh lo a, Kolkata club hian champion an tum avangin Aizawl FC laka point thum an hlawhchhuah loh chuan an lungawi lo ang.

Spanish coach Manuel Retamero chuan, "East Bengal lakah ṭha taka khelh theih kan inbeisei a, point hlawhchhuah tumin theihtawp kan chhuah ang. Kolkata club hi kan hneh thei tih kan hria a, chutihrualin kan chak a nih pawhin East Bengal aiin kan ṭha zawk tihna a ni lo a, I League-ah hian kan champion thei tihna a ni lo. Kan theihna chin kan hriat a ṭul a, kan hmabak match apianga theihtawp kan chhuah hi kan tihtur chu a ni," tiin Vanglaini palai a hrilh.

Aizawl FC hian an match hnuhnung berah Salgaocar an hmachhawn a, injury time-a R. Malsawmtluanga penalty hmangin an sut. Goan club leh Mizo club inkhelh ṭum hian Salgaocar zawkin defensive game an khel a, Santosh Kashyap hnuaiah defender panga an hmang a, Aizawl FC-in inkhel an thunun.

Hriat tel tur atana ṭha erawh Salgaocar-in Aizawl FC an hmachhawn hmain point an la hmu lo, tun ṭuma Mizo club hmachhawn tur East Bengal erawhin goal khung tumin an nawr nghal ang. Red and Gold Brigade hian Mizo pathum S. Malsawmtluanga, Robert Lalthlamuana leh Lalrindika Ralte te an kawl a, Indian leh foreign player ṭha an an nei ṭeuh.

Aizawl FC an hmachhawn hunah Chen-naiyin champion puitu defender Bernard Mendy chu a vawi khatna atan a inlan tawh hmel a, South Korean striker Do Dong-hyun leh Nigerian striker Ranti Martins an kawl bawk.

MPL champion Aizawl FC squad-ah keeper Lalawmpuia a la inhliam a, Albert Zohmingmawia leh R. Malsawmtluanga te erawh inkhel tlaka an dam hman beisei a ni. Goan club an hmachhawn ṭumin Spanish coach-in Alfred Kemah Jaryan aiah Atsushi Yonezawa a luhtir a, minute 45 chauh inlan Japanese striker hian starting eleven a chan nawn a rinawm tawh loh.