Liverpool fan-te an nuar dawn

Zanin dar 8:30-ah Liverpool-in Sunderland an mikhual dawn a, mahse Reds ṭantute chuan Black Cats an hmachhawnna tur inkhel hi an lungawi lohna lantirna remchangah hman an tum.

Liverpool hian an stand thar pakhata inkhel enna man £59 chu £77-ah an tisang a, hei hi duh loin Liverpool ṭantu intelkhawm pawl Spion Kop 1906 leh Spirit of Shankly (SoS)-te chuan an dodal dawn a, Sunderland an mikhual hunah hian fan-te chu minute 77-a khelmual chhuahsan vek turin an sawm a ni.

Spirit of Shankly (SoS) hruaitute chuan ticket man tihsan chungchangah club neituten thuchhuah engmah an siam lo chu an ngaihthiam loh thu sawiin, "Kan club thuneitute hmalakna hi mak kan ti takzet a, kan ṭawiawmna leh Anfield boruak tinung zel turin ticket man hi tih hniam ngei a ṭul zawk niin kan hria a ni," tiin thuchhuah an siam.

Hetihlai hian hliam vanga buai Daniel Sturridge chuan Liver-pool training a zawm leh tawh a, Philippe Coutinho (malpui), Divock Origi (khup) leh Martin Skrtel (malpui) te chu an dam leh hnai tawh ni a sawi ni mah se zanina Sunderland an hmachhawn hunah erawh an inlan thei lo ang.