Cricket World Cup kan nghak chhuak ta: A bul ṭan nan World Cup 2019 final rematch

World Cup 2019 final-ah inelna thlengtu England-in final hmuhnawm bikah New Zealand hnehin a vawi khat nan World Cup nomawi an chawi. India ramin a thlen tur Cricket World Cup-ah England leh New Zealand ten bul an ṭan dawn a, vawiin tlai dar 2:00 hian Narendra Modi Stadium, Ahmedabad-ah an inkhel ang.

England hi nomawi humhim thei turin an ṭha tawk a, warm up match-ah pawh Jos Buttler-a hote hian Bangladesh an hneh. Chutihrualin ruahsur vangin India nen an inkhel thei lo a, Bangladesh aṭang ringawt chuan England dinhmun teh thiam a la har. New Zealand erawh ruahsurin a tibuai ve lo a, warm up match-ah Pakistan leh South Africa an hneh. Nomawi la chawi miah si loin champion rinkai zinga mi an ni.

Williamson-a tel loin

Cricket ngainatute tan New Zealand captain Kane Williamson hi mi thar a ni lo a, hruaitu ṭha bik a nihna leh a batting technique a ṭhat avangin a lar ber zinga mi a ni zawk.

Amaherawhchu, kumin IPL-ah Williamson hi a khupah hliam a tawrh avangin zai a tawk a, thla ruk a chawlh tawh avangin match hmasa ber khel turin a la inpeih lo. Chutihrualin warm up hnihah erawh a inlan ve ve a; Pakistan lakah 54 runs a siam a, South Africa lakah 37 runs siam lehin a 'out' hmain taksa la indim avangin a vaw chhunzawm lo.

New Zealand captain lailawk Tom Latham chuan, "Kane-a hrechiangtute chuan a telin kan ṭha zawk tih an hre vek ang. Chutihrualin kan fimkhur a la ṭul a, zai a tawh hnua a thawhrim zarah World Cup khel tur zingah a tel thei zawk. Warm up-a a khelh dan thlir hian beisei aia hmain a inlan thei ang," tiin a sawi.

2019 Final kha

Black Caps hian Williamson-a tel loin England lakah phuba an lak a ṭul dawn a, hmabak erawh a harsa dawn. World Cup hnuhnung ber final kha final awm tawh zawng zawng zinga hmuhnawm ber leh boruak sanna ber a ni hial ang.

Over 50 an khelh zawhah New Zealand leh England ten 241 runs ve ve an siam. Super Over-ah pawh ram pahnih hian 15 runs ve ve an la siam leh a, mahse Super Over hi khelh nawn tur a ni tawh lo. Boundary an siam zat an chhiar a, England-in boundary vaw chhuak hnem zawkin hnehna an chang.

Khami ṭuma England star chu Ben Stokes a ni a, thi loin 84 runs a siam bakah Super Over-ah run riat a la siam. Stokes hi warm up match-ah bat hman lo a, chutihrualin World Cup pressure sangah erawh a pawimawh leh viau a rinawm.

Rinkai England

England leh New Zealand te hian September thla khan ODI series an khel a, Three Lions hian 3-1 a series an lak avangin Black Caps lakah an inringtawk khawp ang. ODI match thumnaah phei chuan Stokes-a'n 182 runs tehmeuh a siam a, chutihrualin England hian Jonny Bairstow, Dawid Malan leh Joe Root te an kawl avangin mimal pakhata innghat an ni lo.

Opening match en châkawmna tak erawh England-in batting line up an nei ṭha a, New Zealand-in warm up match an khel ṭha. Black Caps hian warm up match vawi hnih an khelhah 300 runs an vaw tling ve ve a, opening match-ah cricket inkhel nung ṭha tak a beisei theih ang.