Insiamṭhat tum Man United an buai tulh tulh

Manchester United-in insiamṭhat tumin Erik Ten Hag-a'n khelh dan hmang leh player a siksawi hret a, result erawh a ngai reng. Old Trafford-ah Man United an chak lo a, an hneh loh Galatasary tan erawh England-a an vawi khat chakna a ni thung.

October 3, Thawhlehni zan inkhelah mualneituin striker thar Rasmus Hojlund hmangin ṭum hnih hma hruai mah se Galatasaray-in Wilfried Zaha leh Muhammed Kerem Akturkoglu te hmangin an sut ve ve a, Casemiro hnawhchhuah a nih hnuah Mauro Icardi-a'n chakna goal a khung bawk.

Man United-in Champions League vawi hnih an khelh tawhah an la chak lo ve ve a, Premier League-a bul an ṭan chhiat ang thoin Europe inelnaah pawh an che chhia. Champions League match hmasa pahniha an chak loh zawn hmasa ber a ni a, Man United record duhawm lo tak a ni.

Hei le, Hojlund

Man United-in Tlumtea thlira an thlir Hojlund-a'n mipui beisei ang ngeiin goal khung a thiam a, UCL match hmasa bera Bayern Munich laka goal a khung hnuah Galatasaray lakah goal hnih a khung.

Minute 17-na lekah Marcus Rashford-a cross chu ṭha takin a tauh goal a, Hojlund hi goal hmahruai khung tur hian Turkish club box chhungah a tlan lut ṭha hle. Hei chauh hi a ni lo, petu awm lo pawh ni se amah pawhin goal khung turin a insiam chawp thei bawk.

Minute 67-naah Hojlund-a'n Galatasary defender tihsual chu halfway line thlen hma hret aṭanga um lutin chak takin goal lam hawiin a khalh a, keeper Fernando Muslera hmaah buaina nei loin 'cool' zetin Uruguayan keeper hi a pet khum. Old Trafford-ah mipui thawm a ring a, mah se tlarhnung pawp vangin hun tawpah erawh an indawm kun ta thung.

Tlarhnung pawp

Man United an khel ṭha a, mahse a pawimawh ber goal venhim an harsat. Galatasaray ball vawrhluh satliah chu Wilfried Zaha-a'n box chhungah a chang a, Diogo Dalot-a'n thahrui a ngah tawk loh bakah a dan tum dan a dik tawk loh avangin Zaha-a'n a club hlui lamah minute 23-naah a khung.

Goalkeeper Andre Onana pawhin tlarhnung inrintawkna a pe lo a, a tihsual vangin 2-1 a hma an hruai laiin Turkish midfielder Akturkoglu-a'n si phurh a sut teuh hle. United-in mual vei lamah specialist left back an neih loh an tuar a, Turkish winger Baris Alper Yilmaz-a'n awlsam takin Sofyan Amrabat a tlan pel - Yilmaz cross hi minute 71-naah Akturkoglu-a'n a khung. Casemiro leh Victor Lindelof ten goal khungtu Akturkoglu hi an hnaih hman lo!

Man United-in first half-ah goal an khung aṭanga minute rukna lekah si phurh an suttir nghal a, second half-ah phei chuan minute lina lekah si phurh an suttir. Mualneitu tana harsatna belhchhah turin Onana-a chesual a, box hmaa awm Dries Mertens a pass. Casemiro-a'n goal venhim nan Mertens a titlu a, penalty a chawi bakah hnawhchhuah a ni.

Onana leh Man United an vannei a, an tihsual vangin hremin an awm lo. Penalty pettu Mauro Icardi-a'n a pet 'out'. Mahse, an tlarhnung a pawp nawn a, hrem an ni. Amrabat-a ball petchhuah ṭha lo chu defender Davinson Sánchez-a'n a tauh let nghal. Amrabat-a'n a dinna a siam rem hman loh avangin offside trap-ah Icardi a tang lo a, Argentine forward hian cool takin an chakna goal a khung.

Engtin zel?

Man United-in September thla tawp leh October thlaah an muala inkhelh tur an ngah avangin an fixture a ṭhaah a ngai theih a, mah se Ten Hag-a naute an insiamṭha thei chuang lo.

Premier League club vantlang Crystal Palace hneh loh zawhah UCL-a team nem zinga mi Galatasaray an hneh lo. October 7, Inrinni hian Man United-in Brentford an mikhual dawn a, result a ṭha lo zel a nih chuan Ten Hag-a hmalam hun thlengin nghawng a nei ṭan ang.

Dutch manager Ten Hag chuan, "Ṭum hnih hma kan hruai a, kan khel ṭha bawk. Mahse, tihsual vangin kan insuttir ve ve a, kan chak lo zui bawk. UCL anga inelna sangah chuan tihsualin hrem zel kan ni a, tihsual hi a thiang lo," tiin a sawi a, inrintawkna an hloh tih a pha lo.

Chutihrualin Man United defender hlui Rio Ferdinand chuan tlarhnung an rem dan chu a mumal loh thu a sawi a, Paul Scholes pawhin tlarhnung siam ṭhat a ṭul thu a sawi bawk. Ten Hag-a naute hian Premier League match sarih aṭangin goal 11 an chhuah a, UCL match hnih lekah goal sarih an chhuah - insiamṭha tur chuan tlarhnung tihphui ran a pawimawh ang.

Bayern chakna rawlthar Musiala leh Tel

Bayern Munich-in FC Copenhagen lakah goal chhuah hmasa mah se rawlthar duhawm Jamal Musiala leh Mathys Tel te hmangin 2-1 in hnehna an chang. Parken Stadium-ah Bavarians 2-1 in an chak a, match hnih khelhah point ruk hmuin group hmahruaitu an ni.

Copenhagen hian Galatasary lakah an goal neih an hum zo lo tawh a, Bayern an hmachhawn ṭumah pawh Harry Kane an ven hneh bakah Lukas Lerager hmangin minute 55-naah an khung hmasa. Lerager-a volley hi a mawi hle.

Kum 20 mi Musiala-a'n a theihna sanzia a pholang a, box pawna ball a chawh kual hnuah minute 67-naah goal kilah a pet lut. Bayern-in si phurh an sut a, mahse Copenahagen-in chance ṭha an nei reng.

A tawpah Bayern chu vannei zawkah an ṭang a, kum 18 mi Tel-a'n chakna goal a khung. Bavarians-in hnehna an chan theih nan veteran player Thomas Muller a pawimawh a, German forward hian a harsa zawng zawng a thawh zawh hnuah Tel a pe a, French rawlthar hian ṭha zetin a khung. Thomas Tuchel-a hoten khualmualah point thum hlu tak an hlawh chhuak.