India hmaah China

Mizo nula Lalremsiami Hmar hoa khel Indian Women's Hockey Team chuan vawiin chawhnu dar 1:30 hian China an hmachhawn dawn. Asian Games final lut turin a thlengtu China paltlang a ngai dawn tihna a ni.

India hi pool A-ah awmin South Korea nen an inhnehtawk bak chu an khingpui an sawp vek, semifinal kalkawngah hian Remsiami chuan goal khat a khung tawh. Goal khungtu aiin ball semtu atan hman tam a ni a, inkhel zawng zawngah player pawimawh a la ni vek.

Kolasib nula Remsiami chuan, "Asian Games neih dawna ka sawi tawh ang khan, kan game pangngai kan khel chhuak thei a nih chuan team dang kan huphurh bik lo, tun ṭumah pawh hian beisei kan nei," tiin China hneh an tum thu Vanglaini a hrilh.

China hi pool B lama pahnih an ni, an khingpui an sawp nasa thei hle - Indonesia (20-0), Kazakhstan (10-0) leh Thailand (2-0) te an hneh, mahse Japan lakah 2-0 in an chak lo thung, ṭhat tawk lohna lai an nei ve tho tihna a ni.

India coach Janneke Schopman chuan, "Tun tournament kan zinkawng hi a ngaihnawm hle a, chuti maia tawp tir kan tum lo. China hi team ṭha an niin kan zah hle a, mahse final luh kan duh," tiin a sawi.