Ligue 1 club lakah Arsenal an tlawm

Chak an inring a, chak tumin Mikel Arteta-a'n a player neih ṭhat a chhawr bawk - mahse Arsenal chu French Ligue 1 club Lens lakah 2-1 in an chak lo. Champions League boruak a danglam a, knockout stage luh a awlsam dawn lo.

Gunners hian Pathianni zanah Premier League champion lai Manchester City an mikhual chhunzawm dawn, an forward ṭha Bukayo Saka chu Lens nen an inkhelhnaah hian a hliam a, an boruak a fuh rih lo a ni.

Group B inkhel dangah PSV Eindhoven leh Sevilla te 2-2 in an inhnehtawk a, match hnih an khelh tawh chinah Lens leh Gunners ten point li ve ve an hmu a, an hnuaiah Sevilla leh PSV te an awm thung.

Inlehthalna

Arteta-a'n a player neih ṭhat a chhawr a, goal pawh an nei hma. Minute 14-naah Saka hnen aṭanga a ball hmuh chu Jesus-a'n a khung a, an lawm chhung erawh a rei lo, goal an neih aṭanga minute 11 a liam chuan anmahni lamah a lut.

Adrien Thomasson-a'n goal kilah mawi zetin an si phurh a sut a, mualneitu lam tan hian second half minute 69-naah Elye Wahi chuan chakna goal a khung a, team ṭha zawka ngaih Arsenal chu tun season chhunga a vawi khat nan an tlawm.

Aaron Ramsdale aia thlan zawk Arsenal keeper David Raya-a'n ball a pet chhuah ṭhat tawk loh vangin goal an chhuah niah a ngaih theih a, defender Gabriel chu a khelh ṭhat ber zan a ni lo bawk - goal hnih aia tam an chhuah lo chu an vannei.

Saka a hliam

Arsenal manager Areta-a'n player duh leh rin bik a nei a, a hming chu 'Bukayo Saka' a ni. England international hi a dam a nih phawt chu inkhel tura thlan a ni zel, season hmasa khan Premier League match a khel kim vek.

Tun season kal laiah pawh a la inlan zel. Kar tawpa Bournemouth an hnehna inkhelah hliam tenau a tuar a, minute 76-naah lak chhuah a ni. Lens lakah inlan zui leh mah se hliam vang bawkin minute 33-naah lak chhuah a ni.

Arteta chuan, "Chiang takin Saka dinhmun ka la hre lo, mahse ni danga a hliam neih tawhna kha chu a ni lo. Ball khen a tumna lamah a tihrawl a hliam niin ka hria, inkhelh chhunzawm thei a ni ta lo," tiin a player chungchang a sawi.

Ruah sur buaina

Chhuanlam siamin inkhel result a tidanglam thei tawh lo a, awmzia a awm tawh lo. Chutihrualin, Arsenal hian inkhelh hmain harsatna erawh an tawk. France ram an pan hma hian England chhim lamah ruah a sur nasa hle.

Thlawhtheihnaa an thlawh chhuah hun chu darkar nga deuhthaw a tih khawtlai a ni a, tlai takah Lens thlengin mutna hun an nei tlem a, ni danga an kalphung pangngai ang takin inbuatsaihna an nei thei lo - an khelh danah a lang chhuak ta a ni.

UCL boruak hi chu a danglam a, ram hran daiha inkhelh a ngaih avangin a awlsam lo. Club lian inkhel an nih ṭhin avangin fans maksak tak tak pawh an awm ṭhin, an khingpui tur thlenna hotel bula bengchheng siam ṭhin pawh an lo awm tawh ṭhin bawk.

Eng nge an sawi?

Arsenal manager Arteta chuan, "A hmasa berah chuan Lens ka lawmpui, team ṭha tak an nih avangin kan rin lawk ang ngeiin inkhel pawh a hautak hle. Goal kan khung hmasa a ni satliah lo a, a tirah khan inkhel kan thunun êm êm bawk.

"Mahse, hun remchang ṭha vawi li vel kan hlah a, inkhel result chinfel theihna turah kan chingfel mai lo kha a pawi. Europe-ah chuan khatiang ang zat remchang kan nei a nih chuan goal khung a ngai," tiin a sawi.

Season hmasa Ligue 1 pahnihna Lens manager Franck Haise chuan, "Kum 21 hnuah Champions League kan khel ve leh a ni a, chumi piah lamah Arsenal lakah 1-0 in kan hniam bawk, chumi hnuah chak leh chu thil mak a ni," a ti.