Napoli khelmualah Real an chak

Real Madrid-in Champions League-a an match hmasa pahnihah hnehna chang turin vanneihna an mamawh ve ve a, a pawimawh ber erawh hun harsaah pawh an chak hram zel hi a ni - Thawhlehni zan khan Napoli chu khualmualah 3-2 in an hneh leh ta.

Napoli hian Leo Ostigard hmangin goal hmahruai an khung a, Real-in Vinicius Junior leh Jude Bellingham hmangin an chhanglet - Napoli tan Piotr Zielinski (penalty) chuan a khung ve leh a, mahse, goalkeeper Alex Meret (own goal) hmangin Real an chak ta tho.

Real-in match hnih an khelh aṭangin point ruk an nei ta a, Napoli leh SC Braga ten point thum ve ve neiin, mawngphah luahtu Union Berlin-in point an la nei lo - thil kal dan thlirin Real hian last 16 chu an lut ngei dawn niin a lang.

Inkhel hmuhnawm

Serie A champion Napoli-in Real lakah chak an tum ngam a, goal pawh an hlawh chhuak hma hle. Minute 19-naah Brazilian centre back Natan-a ball tauh chuan crossbar a per a, a per lehlam chu Ostigard chuan goal-ah a tauh lut.

Mahse, Real an hnufual rei lo. Bellingham chuan Napoli defender tihsual nangchingin, ṭha zeta ball a lakluh hnuah Vinicius tan a siamsak a, Brazilian forward hian minute 27-naah tawih zetin si phurh sutna goal a khung.

Minute sarih a liam a, Bellingham bawk kan hmu. English midfielder hian player thiam bik a ni tih pholangin ṭha zetin goal-ah a chantir a, chawlhlawk hman a nih hmain Real-in hma an hruai let daih!

Napoli beiseina

Italian club-in mahni muala tlawm an duh bik lo - goal an chhuah hnu lawkah Victor Osimhen chuan chance duhawm a nei zui a, mahse, a ball tauh ṭha zet chu goalkeeper Kepa Arrizabalaga chuan ṭha lutukin a dansak.

Second half-ah Napoli hian goal an hlawh chhuak ta nge nge - Osimhen bawk kan hmu nawn a, Nacho Fernandez-a'n a tihtluk avangin penalty a hlawh chhuak. A tirah penalty pek ni lo mah se video assistant referee rawn a nih hnuah referee-in penalty spot a kawk a, Zielinski chuan goal kilah tak a khung.

Mahse, a la tawp lo. Real an beidawng duh lo a, an beidawn duh loh rah an seng ta nge nge. Minute 78-naah Federico Valverde-a shot kawh ṭha êm êm chuan crossbar a per hnuah a per lehlam chuan Napoli keeper Alex Meret-a hnung perin goal-ah a lut a, 3-2 in Spanish club an chak zui.