Liverpool goal pawm loh - VAR inbiakna an tlangzarh

Tottenham Hotspur laka 2-1 a an tlawm hnuah Liverpool boruak a la dai hleithei lo a, Luis Diaz goal khung pawmsak an nih loh chungchanga match official-te inbiakna an dil chu Professional Game Match Officials Limited (PGMOL) chuan an pe chhuak!

He inkhelah hian Video assistant referee chu Darren England niin, VAR assistant Dan Cook a ni a, replay operator awmin, VAR hub operations manager Oli Kohout chu a inrawlh ve bawk.

Luis Diaz goal khung hi a tir berah chuan assitant referee-in offside a phar vanga pawm loh a ni a, hei hi VAR lamin an ennawn - an ennawn zawhah khelmuala thutlukna siam chu a dik thu an sawi a, an kaltlang tir.

Mahse, a hnu lawkah thutlukna an siam sual tih an hre zui a, mahse, an hriatchhuah meuh chuan VAR hi an tlai tawh - Reds goal pawm a ni lo a, VAR lam tihsual a ni, tih chiang takin a lang zui a, Liverpool tan pai dam a harsa ang.

Thutlukna chu

Diaz goal hi offside phar a nih avanga ennawn a ni a, mahse, an inbiakna aṭanga thlirin VAR lam hian an hresual niin a lang - VAR ngaihdanah chuan goal hi pawm sa a ni a, pawm a nih dawn leh dawn loh an enfiahah an inngai.

VAR-in an en zo a, goal hi pawm ang thlapah an ngai. Mahse, referee Simon Hooper chuan khelmuala thutlukna awm sa chu a dik, tiin VAR lamin an rawn nemnghetah a ngai ve thung a, goal a pawm ta lo.

Hetiang a nih takah hian VAR replay operator chu inrawlh lehin, "Khelmuala thutlukna kha offside a nih kha aw," a ti nawn a, VAR lam hian an tisual a ni tih an inhre zui. VAR Hub operations manager Oli Kohout pawh inrawlhin, inkhel chu titawp rih turin a ti.

Mahse, match official-ten thutlukna an siam tawh avangin VAR lamin tihtheih neiah an inngai tawh lo a, an tisual tih inhre reng chungin inkhel hi an kaltlang tir - minute hnih hnuah Son Heung-min chuan goal a khung zui.

A na asin

Liverpool hian Cody Gakpo hmangin si phurh sut mah se, hun tawp dawna Joel Matip 'own' goal hmangin an chak lo zui a, Curtis Jones leh Diogo Jota hnawhchhuah an ni bawk - Matip-a 'own goal' hi zanina Liverpool hmachhawn tur Royale Union Saint-Gilloise manager Alexander Blessin chuan fiamthu thawh nan a hmang zui.

Reds-in season hmasa an hman ṭhat loh rah sengin, tun season-ah Champions League an khel phak lo a, Europa League an khel. Zanin dar 12:30-ah group stage-a an match hnihna an khel dawn a, Belgian club Union SG an mikhual dawn.

Kum 50 mi coach Blessin chuan, "Player ṭha tak Ibrahima Konate leh Joel Matip te kan hmachhawn dawn a, mahse, Matip-a'n anmahni lamah a khung leh mai thei asin - chutiang a nih chuan chance kan nei thei ang chu," a ti.

Blessin hian Liverpool ṭhatzia a sawi nana hmang ni mah se Matip tan ngaihthlak a nuam lo ang tih a chiang a, Spurs nen an inkhela thil thleng avanga an hnualzia ngaihtuahin Liverpool-in Union SG hneh hi an châk zual sawt ang.

Tute nge?

Liverpool tan hliam vangin Cody Gakpo a inlan theih a la rinawm lo a, hliam vanga chawl mek Thiago Alcantara leh Stefan Bajcetic pawh an rawn kir theih a la rinawm chiah lo - coach Jurgen Klopp-a'n a squad a siksawi nualin a rinawm sa bawk.

Chuti a nih chuan tlarhmaah Mohamed Salah chawlh hahdamtirin, Darwin Nunez, Ben Doak leh Jota te chu inkawp tura ngaih an ni a, midfield-ah Harvey Elliot, Ryan Gravenberch leh Wataru Endo te chu an din ho a rinawm.

Tlarhnungah Andy Robertson aiah Kostas Tsimikas lutin, kum 20 mi centre back Jarell Quansah tan chance a awm tura ngaih a ni a, Trent Alexander-Arnold leh Joe Gomez-ah lut tur zawk sawi thiam a harsa a, Konate a lut ngeiin a rinawm bawk.

Brazilian keeper ṭha mi Alisson aiah Caoimhin Kelleher chu si ban nghak tura beisei a ni - Reds hian match hmasa zawkah LASK chu khualmualah 3-1 in an lo hneh tawh.

Union SG?

Zanina Reds hmachhawn tur Union SG hian French club Toulouse chu 1-1 in an inhnehtawkpui a, Belgian Pro League-ah point 19 hmuin hma an hruai mek bawk - Anfield ema chak tura dah erawh an harsa.

Thil danglam tak pakhat erawh Union SG hian player Kevin Mac Allister an nei a, kum 25 mi defender hi Liverpool midfielder Alexis Mac Allister unaupa a ni a, a u zawk a ni - zaninah an inlan a nih chuan unauin an intawng dawn.

Mac Allister unau hi pathum niin, a upa ber Francis Mac Allister chu Argentine club Rosario Central tan a khel mek bawk - zaninah an unau zinga thleng sang ber Alexis-a club khelhna leh Kevin-a club khelhna an intawng dawn a, an chhungkaw tan chuan zan danglam bik a ni ang.

Belgian club hian player langsar vuta sawi tur an nei hran lo a, tun season match riat a khelha goal sarih khung tawh Dennis Eckert Ayensa hi hliam vangin match li a khel lo tawh a, zaninah a inlan thei lo a nih chuan an tan chânna nasa tak a ni dawn.