Hmeichhe nomawi inchuh tur Sofia Kenin vs Garbine Muguruza

Australian Open 2020 khelh ṭan a nih hma khan Serena Williams, Ashleigh Barty leh Maria Sharapova te hming a lian. Hmeichhe singles nomawi inchuh tur erawh seeded chang phak lo Garbine Muguruza leh hriat hlawh sa ni lem lo Sofia Kenin a ni - vawiin chawhnu dar 2:00 hian Rod Laver Arena-ah an intawng ang.

Spain nula Muguruza hi Grand Slam vawi hnih champion tawh niin sulhnu a nei ṭha zawk, American nula Kenin erawh major tournament final a vawi khat khelhna tur a ni thung. Player pahnih hi tun hmain vawi khat chiah an la inkhel a, season hmasa khan Beijing khawpuiah Kenin hian a lo hneh tawh.

Sofia Kenin hi Russia khawpui Moscow a piang a ni a, a sei lenna erawh United States a ni thung. 1986 khan an chhungkua hian Soviet Union chhuahsanin New York an pan, kum 1998 khan Sofia pian dawn boruak vangin Russia lamah an kir leh - a pi in a enkawl pui theih an beisei vanga kir an ni.

Mahse, Russia-a awm zui rei loin Florida, US-ah an kir leh; he hmunah hian tun thlengin a cheng zui. Russian khua leh tui ni si, US lama an pem chhan chu Kenin-i pa Alexander chuan ti hian a sawi, "Ka faten hma hun êng leh ṭha tak an neih ngei kha ka duh.

"Khatih hunlai leh tunlai boruak chu a inang lo, Russia ramah khan engkim mai kha khap a ni a, kan dinhmun a chep hle. Ka nupui Lena leh kan chhungkua khan ṭhianṭha kalsana hriat ngai loh US lama hun va hman kha harsa kan ti hle," a ti.

Alexander hian zanah taxi a khalh a, chhunah english leh computer class a kal thung; rim takin a fanu Kenin-i'n tennis a zir theih nan hna a thawk ṭhin. A fanu Kenin hian a naupan lai aṭangin Maria Sharapova a ngaisang em em a, tunah chuan a 'Idol' hnungzui theihna hun a nei ta.

Tournament dang ang lo takin Grand Slam huangah chuan tawnhriat neih ṭhat a pawimawh, mahse Japan nula Naomi Osaka chuan tun hnaiah player thar leh naupang zawk tan champion theih a nihzia a rawn nemnghet.

French Open 2016 leh Wimbledon 2017 champion hian Melbourne Park-ah bik chuan final a khelh vawi khatna tur a ni ve tho, tun hnai thla 18 chhung vela result a neih ṭhat loh avangin tunah pawh world number 32 daih a ni.

Kum 2014 hnua a vawi khat nan seeded ni phak lo chungin Grand Slam a hmachhawn, chutih rualin a khelh ṭhat ṭum a tawng thung si. Semifinal-a Simona Halep nen an intawn ṭumin set pahnihah hnuaihnung zawk ni chungin a tho chhuak thei - inrintawkna a nei sang hle.

Halep hian, "Hetianga a khel reng a nih chuan number 1 a ni thuai ang," tiin Muguruza hi a fak. Hmeichhe singles nomawi hi Florida-ah nge Spain ram lamah hawn a nih ang tih chu vawiin tlaiah tih chian a ni dawn.

 Age: 21    World ranking: 15

 Nation: United States    Grand Slam titles: 0

 Seeding: 14    WTA titles: 3

 Garbine Muguruza

 Age: 26    World ranking: 32

 Nation: Spain    Grand Slam titles: 2

 Seeding: Unseeded    WTA titles: 7