Fiorentina chak chiang

Thawhlehni zan khan Serie A inkhel pakhat a awm a, season bul ṭan ṭha pangngai tak Fiorentina chuan an mikhual Cagliari chu 3-0 in an hneh a, point thum an hlawh chhuak.

Fiorentina tan hian Nicolas Gonzalez leh M'Bala Nzola ten goal khat ve ve an khung, heng bakah hian Alberto Dossena chuan anmahni lamah a ti lut palh bawk a, mikhual team lamin a chhanletna tur an nei lo.

Vincenzo Italiano enkawl Fiorentina hian tun season Serie A match vawi sarih an khelh aṭanga point 14 an neiin pangana an ni mek - pathumna Napoli nen an point neih zat a inang a, a chung bera mi Inter Milan an phak lohna chu point li chauh a ni.

Manager tawnhriat ngah Claudio Ranieri hoa khel Cagliari erawhin chak ni hmel an la hmu ve lo, anni bakah hian Udinese leh Salernitana te chu la chak ve miah lo an ni a, point hnih neitu Cagliari hi a hnuai berah an awm.