Burnley an chak ve ta

Championship thunun chunga Premier League-a inpetkai Burnley-in match sarih khelh zawhah chak hmel an hmu ta a, Vincent Kompany hote hian Thawhṭanni zan khan kai thar ve tho Luton Town chu 2-1 in an hneh.

Kenilworth Road-ah mikhual Clarets-in bul an ṭan ṭha a, goal chance ṭha an hlah hnuah first half injury time-ah mawi zeta Luton tlarhnung ṭhiatin Lyle Foster-a'n goal hmahruai a khung.

Second half-ah Luton an insiamṭha a, Jacob Brown ball tauh chu keeper James Trafford-a'n dang thei lo mah se goalline aṭangin midfielder Josh Cullen-a'n a tauh chhuak. Mualneitu hi penalty beisei pek an ni lo a, mah se minute 84-naah Elijah Adebayo hmangin siphurh an sut ta tho.

Kenilworth Road-ah thawm ṭha hman viau mah se Jacob Bruun Larsen-a'n minute khat pawh tling loah mual dinglam aṭanga lalutin goal ṭha bik leh Clarets chakna goal a khung. Burnley-in point thum hlu bik an hlawh chhuak a, Bournemouth leh Sheffield United chungah awmin 18-naah an inhlangkai.