Newcastle tan zan duhawm - PSG an sawp

Newcastle United-in kum 20 hnuah Champions League an khel a, Europe-a inelna sang berah hian group hautak berah Eddie Howe naute hi an awm. Inelna ṭan hma hauhin Magpies dinhmun derthawng nghala ngaih ni mah se hun khirh chu hun lawmawmah an chantir. October 4, Nilaini zan khan Newcastle hian an group-a hming langsar ber Paris St-Germain chu 4-1 in an sawp.

Group F inkhel dangah Borussia Dortmund leh an mikhual AC Milan te goal awm loin an inhnehtawk. English club Magpies hian match hnihah point li hmuin hmahruaitu an ni a; PSG (3 pts), AC Milan (2 pts) leh Dortmund (1 pt) ten an dawt.

Mumang ram chu

Newcastle-in 2002-03 season khan UCL an khel a, an striker chhuanvawr Alan Shearer hoin first round an paltlang. Hemi hnu lamah erawh Magpies hi an tla hniam hret hret a, kum 2009 leh 2016 ah khan Premier League aṭangin an tlahniam hial.

Champions League khelh hi vana rah ang a ni a, football film lar 'Goal' kha Magpies ṭantute tan chuan mumang ram a ni. Mexico ram aṭanga dan loa Los Angeles-a pem Santiago Munez chu Newcastle player hlui leh scout Glen Foy-a'n a hmu fuh a, Premier League-a khelhna remchang a neih phah.

Munez vanneihna a kal tluang a, Newcastle senior team tan a khel pha ta hial. An stadium chhuanvawr St James Park-a entu mipui khat ṭhapah league match hnuhnung berah Liverpool an hmachhawn a, UCL khel turin chak an mamawh. Munez hian chakna goal a khung a, Europe inelna sang ber khel turin a tling.

A tak ram chu

Saudi Arabia hausakna hmangin Newcastle an insiam lian a, Chelsea leh Manchester City te neitu nei thar tirh laia an sum hman dan nen erawh a inang lo deuh. Magpies hian Eddie Howe hmangin team an din a, sum hmang bawk mah se player langsar an lalut chiam lo.

Chutichung chuan Magpies hi UCL khel turin an tling a, Europe-a an match match hmasa berah San Siro-ah Europe club ropui AC Milan lakah point hlu tak an hlawh chhuak. Milan-ah Magpies an vannei a, PSG lakah beisei san an la har.

Mahse maw, Nilaini zana thil thlen dan chu 'film' ang mai a ni. Magpies-in Kylian Mbappe telna PSG chu 4-1 zetin an sawp a, Toon Army an lam. St James Park boruak hi thua sawifiah chi a ni lo.

Game chhinchhiahtlak

Toon Army hian kum 20 hnua an muala UCL an khelh dawn avang ringawtin an phur tawh. Mipui boruak a ṭha a, team boruak a ṭha tel. PSG hmachhawn mah se Magpies an khel ṭha.

Minute 17-naah Alexander Isak-a ball pet ṭha chu Gianluigi Donnarumma-a'n dang mah se a per chu Miguel Almiron-a'n a khung. Magpies hian goal neih humhim tum ringawt loin na takin French club an nawr a, keeper Donnarumma pawh a rim hle.

Minute 39-naah Kieran Trippier freekick chu defender Jamaal Lascelles-a'n tauhin Achraf Hakimi kutah a perah ngaiin penalty an beisei. Mahse, ball a thi lo. PSG defender Manuel Ugarte-a'n an lamah pet sual a, keeper-in a dang. A per chu Bruno Guimaraes-a'n goal-ah a pet leh a, keeper-in a dang leh. Hemi per hi Guimaraes-a'n a cross lut ta zawk, 6ft 7in zeta sang Dan Burn-a'n a tauh. Keeper Donnarumma-a'n dang hman mah se referee-in a sana a en a, GLT hmangin goal-ah pawm a ni.

Kum li liam taa Championship club vela la tal, Burn-a'n Champions League-ah goal a khung. Burn-a tan hun chhinchhiahtlak a ni a, Newcastle tan pawh an khaw tlangvalin goal a khung hi a hlu bik hle. Second half-ah pawh Newcastle an la phur zel a, minute 50-naah Sean Longstaff-a'n Trippier-a ball fing um lutin kawh zetin a pet goal. Kum 25 mi Longstaff pawh hi Newcastle tlangval tho a ni a, PSG mangchhia hi Newcastle tan vanram tlafual a ni thung.

PSG-in player ṭha rual a kawl a, an theihna a sang bawk a, minute 56-naah Magpies tlarhnung an ṭhiat mawi hle. Ousmane Dembele ball pek chu kum 17 mi rawlthar theihna sang bik Warren Zaire-Emery-a'n changin box chhungah a vawrhlut a, Bayern Munich aṭanga an lakluh Lucas Hernandez-a'n Newcastle offside trap bumin a tauh goal.

Goal hian PSG beiseina siam bawk mah se 'comeback-na' goal ni loin scoreline timawitu chauh a ni ta zawk. Injury time-ah Newcastle bawkin an khung belh a, Fabian Schar-a'n box pawn aṭangin kawh zetin a pet lut. Chak phu zawk Newcastle 4-1 in an chak.

Engtin zel?

French chanchinbu lar L'Equipe chuan PSG player-te chungah zahngaihna a lantir lo a, inkhelh hma hming langsar ber chu player rating-ah mark 10 hmuh theihah mark hnih chiah a pe. St James Park-a inkhel entu PSG chariman Nasser Al-Khelaifi pawh a hmel aṭangin a lungawi lo tih hriat theih.

Mbappe hi Magpies defender-ten an vang ṭha a, Lionel Messi leh Cristiano Ronaldo thlaktu tura an sawi French forward hian beisei a pha lo. Chutihrualin Newcastle an khel ṭha thlawt a, an club chanchina hun duhawm ber zing a ni phak hial ang.

December 2021 kha chuan Premier League mawngphahah Newcastle hi an awm a, October 2023-ah erawh Champions League an khel ringawt lo - French champion PSG an hneh. RC Lens-in Arsenal an hneh khan Ligue 1 chuan social medial lamah, "Farmers League an che leh ta," an ti. Tunah erawh Ligue 1 champion lai leh hmahruaitu nilai PSG chu Newcastle United lakah an mualpho a, insawifiah ngaihna a awm lo. Chutihrualin match ruk khelh turah match hnih chauh an la khel tih hriat a ṭha.