India chet ṭhat ber ṭum a thleng: Neeraj Chopra bawkin gold medal a la

Asian Games 2023 neih laiah India chuan nimin tlai thleng khan chuan medal 86 a la tawh - Asia ramte infiamna khawmpui lianah hian medal a lak hnem ber ṭum a tawng a, medal a lak belh zel dawn bawk niin a lang.

India tlangval feikhawh thiam Neeraj Chopra chuan Nilaini zan khan gold medal a khawh chhuak a, ani bakah hian Kishore Jena chuan silver medal hlawh chhuak bawkin mipa intlansiaka 4x400m relay team chu pakhatna an ni bawk.

Asian Games bika India-in medal a lak hnem ber chu Jakarta and Palembang Games 2018 kha niin, hemi ṭum hian medal 70 a la - record hmasa hi a khum chiang ta hle - Nilaini chhun leh zan khan athletics huangah medal pasarih ngawt an la.

Olympic gold medalist Neeraj-a'n a khawh fuh berah 88.88m a thui a khawh a, hei hi pakhatna nih nan a tawk. Kishore-a pawhin 87.57 a thui a khawh a, feikhawh a hmachhawn tawh china a khawh thui ber ṭum niin a phu ang ngeiin pahnihna a ni.

India medal beiseina zinga mi PV Sindhu erawhin a tum ram a thleng phak lo. Badminton-a olympic medal vawi hnih dawng tawh Sindhu hian Chinese player He Bingjiao chu 16-21, 12-21 in a hneh lo a, quarterfinal-ah a zinkawng a tawp.

Tokyo Olympic-ah khan chuan Sindhu hian Bingjiao hi straight game hmanga hnehin bronze medal a la, tun ṭumah erawh tualchhung nula a chungnung hle a, game hnih an khelh chhungin India nula a che thei lo zawkah a ṭang tluan.