China lakah India chak lo

Asian Games hmeichhe hockey inelnaah Lalremsiami Hmar telna India team chu China lakah 4-0 in a chak lo zawkah an ṭang, final thleng phak loin semifinal-ah an zinkawng a tawp, bronze medal match erawh an la hmabak ang.

Nimin tlai semifinal inkhel hmuhnawmah Remsiami'n bul a ṭan a, ball semtu atan hman a ni. A tirah China lamin an nawr na a, minute 25-naah Zhong Jiaqi-i ball vuak chu Indian player ten lo dang pialin anmahni lamah a lut.

India lamin set tumin bei mah se China bawkin Zou Meirong hmangin an khung belh. India hian penalty corner (PC) aṭangin hun an insiam nual, mahse PC aṭanga ball kal vawtu in goal-ah vaw lut mah se, a 'hit' hmasa bertu a nih avangin goal chhunga board a per a ngai, a san hret avangin goal atan pawm a ni lo.

Remsiami hian mual laiah Chinese player ball chan lai chhuhsakin goal lamah a tlanpui a, penalty corner an hlawhchhuah phah. Mahse, India nulate hian ni danga goal khung nana an hman ṭhin PC pawh an chhawr ṭangkai thei tlat lo.

Goal khung an tum lutukna lamah India-in tlarhnung lam an mangnghilh deuh, hmunawl awm zeuhah China chuan Liang Meiyu leh Gu Bingfeng te hmangin an goal thumna leh goal hnuhnung ber an khung.