Dan theih loh Manchester City

An chak zo dawn lo emaw tih hnuah pawh Manchester City hi chu an chak leh mai ṭhin.Nilaini zan inkhelah hun tawp dawna Julian Alvarez leh Jeremy Doku te goal hmangin RB Leipzig chu 2-1 in an hneh.

Champions League champion lai Man City tana Phil Foden goal chu RB Leipzig lamin second half tir lamah Lois Openda hmangin an sut a, manager Pep Guardiola-a'n hun tawp dawn lamah bench aṭanga a luh tir player a chhawr.

Argentina international Alvarez leh Doku te hi bench aṭanga lut ve ve an ni a, goal an khung a ni satliah ringawt lo - an pahnih hian an goal khung tur an insiamsak tawn ve ve a ni.

Citizens tan hian Foden-a'n freekick aṭangin goal ban a tihper bakah, striker Erling Haaland chuan a remchang neih a hlah nual bawk, a tawpah erawh an phu ang ngeiin point thum an hlawh chhuak.

Guardiola chuan, "Inkhel result aṭangin ka naute ka teh dawn lo, player 10-in goal an ven tawh chuan thil hi a awlsam bik lo a ni. Kan hmabakah Arsenal an la awm bawk," tiin a sawi.

Premier League, UCL leh FA Cup champion ni bawk Man City hian Pathianni zanah Emirates Stadium an tlawh dawn. Gunners nen an inthlauhna hi point khat lek a ni a, chetsual chuan hmahruaina hloh thei an ni dawn, chuvangin kar tawp an inkhel tur a ngaihtuah tel tih a chiang.

Spanish manager Guardiola chuan, "Player zawng zawng khan an tih tur chin ṭha takin an hlenchhuak. Bench aṭanga lutte pawh inkhel bul an ṭan loh avanga lawm lo hmel hmuh tur an awm lo," tiin a naute rilru puthmangin a tih lawm thu a sawi bawk.

Man City tan Leipzig khelmual hi chak harsatna hmun a ni - Champions League bikah vawi thum an inhmachhawnna a ni a, a vawi khat nan Man City hi an chak ta chiah, an record ṭha lo an thai bo.