World Cup 2030 - Ram paruk, khawmualpui pathumah!
"Khawvela ennawm ropui ber," tia an sawi ṭhin World Cup 2030 thleng tur a chiang ta a, Spain, Portugal leh Morocco ten an inthlen ṭawm dawn - thil danglam tak chu World Cup match hmasa pathum chu Uruguay, Argentina leh Paraguay-ah khelh a ni dawn bawk!
World Cup 2030 hi World Cup khelh hmasak ber a nih aṭanga a kum 100-na a tur a ni a, hemi a nih avang hian a lawmna chi khat atan match hmasa pathum hi South America-a khelh tura ruahman a ni - World Cup hmasa ber hi kum 1930 khan Uruguay-ah khelh a ni.
FIFA president Gianni Infantino chuan, "Khawvel darhsarh tawh takah hian FIFA leh football chu a ṭhiangin a kal dun zel a ni. Football khawvel aiawhtu FIFA Council chuan inlungrual takin kum 1930-a Uruguay-a khelh ṭan FIFA World Cup kum 100-na lawm dan tur a rel a ni.
"Kum 2030-ah chuan khawvel hriatreng tawh tur thil kan hnutchhiah dawn. Khawmualpui pathum - Africa, Europe & South America aṭanga ram paruk Argentina, Morocco, Paraguay, Portugal, Spain leh Uruguay te chuan lawm takin, FIFA World Cup leh a kum 100 tlinna lawm chungin football an lo kuangkuah dawn a ni," a ti a, a phur hle.
Ruahmanna chu
FIFA ruahmanna hi kaltlangpui nghal tawp tur a ni lo a, nakkuma neih tur FIFA Congress chuan a pawm ve leh a ngai dawn - harsatna erawh awm lo tura ngaih a ni. Ruahman dan chuan World Cup match hmasa ber khelhna Montevideo, Uruguay chuan kum 2030-a World Cup match hmasa ber chu an thleng ang a, Argentina leh Paraguay ten match khat ve ve an thleng leh ang.
Match dang zawng erawh Spain, Portugal leh Morocco-ah te khelh tur a ni ang. Hetihrual hian environmentalist tam tak chuan FIFA thutlukna an sawisel a, ram hrang hranga inelna thlen chuan thlawhtheihnaa zin a tih tam dawn avangin khawvel boruak nasa takin a tihchhiat belh dawn niin an sawi.
World Cup 2030 hi Asia leh North America ramten World Cup an thlen zawh deuh chauh avangin an thleng thei lo. A tirah chuan Spain leh Portugal hian inthlen ṭawm dilin, March 2023 khan Morocco hian ram pahnih hi an zawm ve leh a, ram pathumin an thleng dawn ta.
Uruguay–Argentina–Chile–Paraguay te ṭang ho pawhin World Cup thlen hi an dil ve tho a, anni dilna erawh a tlang ta lo. Morocco hi kum 2010-a South Africa hnua African ram, World Cup thleng leh hmasa ber tur an ni ang.
A chhehvel
World Cup-ah inelna thlengtu chu qualifier khelh ngai loin an tling nghal zel. Uruguay, Argentina, Paraguay, Spain, Portugal leh Morocco te chu World Cup khel turin an tling sa tihna a ni a, World Cup 2030 khel tur ram paruk chu a chiang tawh tihna a ni!
Chutihrual chuan World Cup 2030-ah hian team tel zat tur hi team 48 an ni tawh dawn. World Cup 2022 thleng khan ram tel zat chu 32 an ni a, World Cup 2026 aṭangin ram 48-ah an pung dawn - 2026 hi Canada, Mexico leh USA ten an inthlen ṭawm dawn thung.
FIFA chuan World Cup 2034 chu Asian Football Confederation leh Oceania Football Confederation hnuaia ramte chauhin an thlen theih thu an puang nghal a, hemi rual hian AFC hnuaia mi Saudi Arabia chuan World Cup 2034 thlen an dil tur thu an sawi nghal.
Saudi hian tun hnaiah infiamna khawvel chu nasa takin an run a, football star lar ber ber an ramah thlem lutin, Formula 1, golf leh boxing thlengin an inrawlh a, pawl ṭhenkhatin Saudi chu infiamna hmanga khawvel hmaa a hmai bal phihfai tumah puh mah se, Saudi Arabia prince Mohammed bin Salman chuan pawi a tih loh thu a lo sawi tawh!