Lionel Messi tel loin Miami chak lo

Lionel Messi-a'n Inter Miami a zawm tirhin danglamna nasa tak a siam a, a hma lama chak hleithei lo kha an chak ngar ngar a ni ber mai. Mahse, Argentina captain hi tunah chuan hliam vangin a chawl mek, a team an chak hleithei lo.

Nimin zing Major League Soccer (MLS) inkhelah Chicago Fire chuan an mikhual Inter Miami hi 4-1 in an sawp, mualneitu Chicago tan Xherdan Shaqiri leh Maren Haile-Selassie ten goal hnih ve ve an khung a, mikhual team goal neih chhun hi Josef Martinez-a'n penalty aṭanga a khung a ni.

Argentina tan World Cup qualifying a khelhna lamah Messi a inhliam a, club lamah a kir leh hnuah minute 37 chauh a la inkhel, hliam vangin tun hnaiah a inlan thei lo a, a inkhelh theih hun tur chiang taka sawi a la ni lo bawk.

Messi a inkhelh beiseiin Soldier Field-ah mipui 62,124 zet an pungkhawm - MLS match khata entu tam ber ṭum a ni hial. Mahse, September 3 hnua match khat bak la khel lo Messi hi a hliam a la dam loh avangin a inlan lo, entu lamin an duh ang tak an hmu lo tihna a ni.

Inter Miami midfielder Sergio Busquets chuan, "Leo hi dam thuai thuai se tia duh ber chu amah a ni, a chhan chu ani hi chu inkhelh reng duh mi a ni. A dawtah chuan keini a teammate-te kan ni ang, a chhan pawh kan tana mi ṭangkai a nih vang a ni.

"A tel loa result kan nei ṭha lo hi a hrehawm a, a zahthlak bawk. Amaherawhchu, football khawvelah hi chuan hliam hi chu kan thunun theih piah lam a ni," tiin a sawi.