China Open champion Sinner

Jannik Sinner chuan Daniil Medvedev hnehin China Open nomawi a chawi. Nilaini zana final inkhel hmuhnawm takah Italian tlangval hian darkar hnih chuang an inbeih hnuin 7-6(2), 7-6(2) in a chak.

Tun hmain Sinner hian Medvedev hi a la hneh ngai lo, an intawn hmasak vawi rukah a chak lo vek. Mahse, tunah erawh thawnthu ziah danglam a ni ta, tun hma lama a hneh theih ngai loh ngei kha hnehin a champion ta ni.

Beijing khawpuia inelna neihah Sinner hian champion a phu, final kalkawngah hian world number 2 leh seeded pakhatna ni bawk Carlos Alcaraz a lo hneh tawh bawk a, inelna a hmachhawn danah a lungawi ngei ang.

Kum 22 mi Sinner chuan, "Daniil, min chak tir ve avangin ka lawm e. Inelna hautak tak min chawpchhuahsak ṭhin a, a bik takin kumina kan inkhelhte hi a hautak thei hle, nang hian player ṭha leh hriam zawkah min chher chhuak.

"Ka tan chuan China Open hi duhthusama duan lawk ang mai a ni, chona hautak leh harsa tak tak ka hmachhawn te ka paltlang thei, ka tan chuan nomawi bakah tournament hlu tak a ni," tiin a sawi.

China Open-ah hian Novak Djokovic chu a inlan ve lo. US Open nomawi a chawi hnuah Djokovic hian Serbia tan Davis Cup a khel zui nghal a, tunah chuan a chawl hahdam rih a ni. Grand Slam zo tawh mah se number 1 ni chunga season khar turin tournament dang a la khel leh ang.

Mipa inelna an zawh tawh laiin hmeichhe lam erawh last 16 an la khel chauh. Nilaini zan khan Iga Swiatek chuan Pole Magda Linette chu 6-1, 6-1 a hnehin quarterfinal a lut - vawiin hian Anhelina Kalinina hnehtu Caroline Garcia nen an inhmachhawn leh ang.

Inkhel dangah French Open champion hlui Jelena Ostapenko pawhin seeded palina Jessica Pegula 6-4 6-2 in a hneh a, quarterfinal-ah Liudmila Samsonova nen an intum dawn, ani hian Marta Kostyuk 6-4 6-7(4) 7-5 in a hneh a ni.