Atletico mawina Álvaro Morata

Season duhawm tak hmangtu Álvaro Morata chuan a season hman ṭhat a chhawm nung zel a, Champions League match-ah goal hnih a khung - Nilaini zan khan Atletico Madrid chu Feyenoord Rotterdam lakah 3-2 in hnehna a chanpui.

Atletico khelmuala inkhelah hian Ducth team-in rin loh takin goal an khung hmasa zawk a, Atletico defender Mario Hermoso chuan minute sarihnaah an lamah a tilut - minute nga hnuah Morata a inlar zui a, si phurh sutna goal a khung.

Mahse, Feyenoord hian minute 34-naah hma an hruai nawn. David Hancko-a shot chu Jan Oblak chuan dang zet mah se a per lehlam chu Hancko hian goal-ah a chantir a, 2-1 a ni.

Atletico-in mahni muala tlawm erawh an tum lo. Antoine Griezmann chuan first half hun pek belhah si phurh sutna goal a khung a, Morata chuan second half ṭan aṭanga minute hnihna lekah chakna goal a khung zui bawk.

Feyenoord tan Brazilian winger Igor Paixão che vel a hmuhnawm takzet a, mahse, a pawimawh ber goal a khung thei lo - Atletico tana si ban nghaktu Oblak a khel ṭha bawk a, a tawpah mualneitu team an chak.

Atletico striker Morata chuan, "A pawimawh ber chu rinna leh beiseina hloh loh a, a tawpah kan tan a ṭha zawngin thil a thleng ang, tih beisei tlat hi a ni. Mahni mualah goal khungin hnehna kan chang a, ka lawm hle.

"Eng team tan pawh kan khelmual aṭanga result ṭha tak hawn chu a harsa zel ang," a ti zui a, a inringtawk hle - kum 30 mi Morata hian tun season inelna hrang hrangah match riat khelin goal sarih a khung der tawh.

Atletico hian group E-ah match hnih khelin point li an nei tawh a, Lazio nen an point hmuh zat a inang - Feyenoord hian point thum an nei mek.