India leh khawvel champion

Sap hoin India an awp lai aṭang tawh khan cricket hian kan ramah bu a khuar nghet tawh tih ziak hmasa lamah kan lo thai lang tawh a. Amaherawhchu, khawvel hriata cricket ram ropui anga India hi chhal a nih ve ṭanna chu tun hnu mai chauh hi a la ni.

International Cricket Council (ICC)-in World Cup a buatsaih ṭan kum hi 1975 a ni a, kum li dana nghah ṭhin niin - 1975 leh 1979-ah te kha chuan, India hi tikimtu zinga mi ve mai an la ni. Intlawh (tour) an neih ṭum a, an chet ṭhat vak ngai lohna Kumpinu rama nghah a lo ni ṭhin bawk nen beisei a sang lo ṭhin hle.

Kum 1983 khan World Cup hmasa pahnih nghahna bawk, cricket hmunpui England-ah inelna nghah leh a ni a, West Indies ropui vanglai a ni bawk a, tu te mahin Hamara Desh hi besei an nei sang lem lo. 

Captain Kapil Dev a hoin batsman ropui Sunil Gavaskar a bak chu tumpuite mut ti tui lo tur khawp hming lian awm lo mah se, Indian Team chuan Nikir thla ni hmasa ber chuan London khawpui chu an han rap kai ve ta a.

Mak tak maiin, group stage inkhel hmasa berah  rinkai ber leh champion lai, superstar hlang West Indies chu an hneh ve mai a. India-in Windies an hneh hi hetih hun lai chuan 'upset' a ni. Hnehna hian Kapil Dev-a leh a naute inrintawkna nasa tak a pek phah bawk.

Group match bul ṭan nan West Indies hneh mah se point hmu sang pahnih chauhin semifinal an luh dawn avangin ṭan mar a ngai a, tha thlah a thiang lo. June 18, 1983 khan India leh Zimbabwe an inhmachhawn a, cricket chanchina theihngilh tawh ngai loh tur a thleng. 

Kent khuaa Nevill Khelmualah chandamtu ropui, superstar hming dai leh tawh ngai lo tur Kapil Dev chu tu nge a nih tih khawvelin a hre ta. Zimbabwe lakah batsman panga an thi tawh a, India chuan run 17 chauh an la vaw chhuak. 

Chutah captain Kapil Dev chuan tailender (Batting order tawp lama lut, batsman ṭha lo zawkte an ni ṭhin) ho bat puiin four vawi 16 leh six vawi ruk a hlap a, ball 138 hmachhawnin run 175 a hlap chhuak.

Chak lo thei dinhmuna ding tawh India chu Kapil Dev-a'n a rawn chhan chhuak. Batsman ropui leh cricket legend Sunil Gavaskar chuan, "One Day Innings ka hmuh tawh zawng zawnga la ropui ber," tiin a sawi hial a, hei hian Kapil Dev-a hnathawh ropuizia a sawifiah ṭha hle.

Thil pawi deuh erawh hemi ni ber kher hian 'live-a'  inkhel record-tu BBC-te lungawi lohna lantira strike an lo buatsaih ni a nih avangin khawvelin video clip en let leh tur a nei lo. Pasalṭha thawnthu inhrilhchhawn leh a hun laia mit ngeia hmutute thu kam chhuak bak thangtharten beisei tur kan nei ta lo a ni.

Kapil Dev-a hnathawh ropui tak hmangin India-in inrintawkna an nei a, match hmasa lama an hneh loh Australia hneh chhunzawmin semifinal an lut. Men in Blue awmna group-ah hian West Indies, Australia leh Zimbabwe te an awm a, vawi hnih ṭheuh an inkhel chhuak. Windies hi India lakah vawi khat an tlawm tih loh chu an chak vek a, group-ah pakhatna an ni.

India hi pahnihna an nih avangin semifinal-ah inelna thlengtu England an hmachhawn a ṭul phah. Old Trafford, Manchester-ah (Football stadium nen ngaih pawlh loh tur) ram pahnih hi an inhmachhawn a, over 60 khelh hun lai niin Kapil Dev bawk a che ṭha. India captain hian wicket thum a la a, England-in run 213 an siam.

Semifinal-ah India top order an che ṭha a; Yashpal Sharma (61), Sandeep Patil (51) leh Mohinder Amarnath (46) te run siam tam zarah ball 32 dah bangin run 217/4 siamin hnehna an chang. India-in final an lut a, an khingpui chu champion lai West Indies an ni.

India-in final an thleng hi thil mak a tling. Cricket khelmual ngaihhlut hlawh Lords-ah final khelh a ni a, India hmaa ding hi West Indies an nih miau avangin tu nge champion ang? tih lam ai mahin engzahin nge West Indies an chak ang? tih chu khatih hunlai zawhna lian ber zawk chu a ni.

Vanglaini Silly Point-in semifinal-a India hero Yashpal Sharma kan be pawp a, ani chuan, "Team ropui kan ni lo a, superstar phei chu Kapil Dev leh Sunil Gavaskar bak kan nei lo. Kan team inlungrualna chu kan ṭhatna a ni a, England ball swing duhna hmun hmang ṭangkai turin kan pace bowler te hi vawm kawh chi ni lo mah se ball vawm swing thiam an ni a, Kapil Dev-a'n hmahruaiin, Sandu, Roger Binny, Madan Lal, Amarnath a te kha an vawm ṭha thei em a ni" a ti.

Ball sen leh kawr var suit veka player-te an la inthuam hun lai a ni a, over 60 khelh a ni chungin India in final-ah run 182 chauh an siam. West Indies tan target harsa niin a lang lo a, batsman ropui an intlar ṭhap avangin India tan champion beisei ngam a har. Amaherawhchu, India bowler-te'n khawvel an barakhaih a, Kapil Dev-a'n wicket khat chauh la mah se over 11 aṭangin run 21 chauh a pe tih hriat a ṭha.

Madan Lal leh Mohinder Amarnath ten wicket thum ve ve an la a, over 52 lekah India bowler-te'n Windies an vawm hlum vek a, run 140 chauh an siam. India chu a vawi khat nan World Cup-ah an champion a, West Indies-in a vawi thum nana khawvel champion an inbeiseina chu an tihtawpsak.

Kapil Dev-a hoten hnehna an chan dan hi upset tih theih ni mah se group stage-ah pawh an hneh tawh avangin 1983 World Cup champion team hi sawi nep theih a ni lo - an ropui takzet.

Nikir thla 25, 1983 kuma, Lords bathlara Kapil Dev-a'n World Cup nomawi a chawi meuh chuan, India ramah chuan zanrei a ni tawh a. Amaherawhchu, Delhi tlang 

aṭanga Madras khawpui thlengin halpuah leh halmawi chi hrang hrang nen, India ram chuan lawm avanga tlaivar a puang a ni ber.

Tuma beisei loh India chu World Champion a ni miau a, khawvel hnehtu an ni. Cricket game chuan India ramah rahbi thar a chuang kai ta a, pasalṭha rammute chu 'celeb' niin, India rama rawlthar te chuan an poster chu an pindan banga tar loh hlauin, an inchuh zo a ni ta ber a, nasa takin India cricket chu sum leh paiah a invawrh phah.

Tun dinhmuna India rama cricket a lar zual nasat chhan leh, sum leh pai lama khawih phak loh khawpa BCCI a lo len tak nachhan lian ber zinga mi chu kum 1983-a World Cup champion team Kapil Dev leh a hote vang hi kan ti thei awm e.

Kumpinu ram hlira nghah ṭhin World Cup chu 1987 kumah chuan India rama nghah a lo ni ta hial a, mahse thlengtu ram India hian rawlthar duhawm Mohammad Azharuddin te, Navjot Singh Sidhu te rawn inlar ṭan mah se, rinkai ber nichungin semifinal-ah an tawlhthlu a, champion zawnna hun remchang an bawhpelh.

Kum 1992 World Cup chu Australia leh New Zealand ramah nghah a ni a, hemi ṭum hian India-in beisei phak loin knock out stage pawh an thleng zo lo. India leh a ṭhenawm ramten kum 1996-ah World Cup an inthlen ṭawm a, Sachin Tendulkar a vanglai alo ni bawk nen beisei sang tak nen Azharuddin leh a hote khel mah se semifinal-ah bawk an tla.

Eden Garden, Kolkata-ah Sri Lanka lakah an mualpho a, mahni rama champion-na hun remchang chu ṭum hnih ngawt mai mumang angin a thamral. Hemi ṭuma Kolkata fan-te thinrim chet dan chu India Cricket History a hun thim leh theihngilh tlak a ni.

Kum 1999-ah England-ah nghah a ni a, ṭum dang angin India thawm lian mah se eng teh ual an ang lo. Kum 2003-ah South Africa ramah inelna neih a ni a, captain ṭha mi tuna BCCI president Sourav Ganguly a kaihruaina hnuaiah final meuh an lut. Amaherawhchu, Australia lar vanglai leh hneh theih loh nun an chanlai an tawng fuh a, 'planet' dang aṭanga lokal emaw tih mai tur Australia team laka a ṭha ber dawttu nihnaa lungawi mai a ngai ta thung.

Kum 2007-ah West Indies-ah inelna neih a ni a, mualpho takin an rawn let. Team boruak ṭha lote, player-te khelh ṭhat tawk loh avangin, group stage-a Bangladesh laka an mualpho hnuah knockout stage pawh inhlangkai zo loin dawl zawrin an zawr a, player-te in leh lo venhim ngai khawpa hun thim kha khelmuala an khelh dan ai maha lar zui ta zawk a ni hial awm e.

India cricket hi chu sap ho thisen kai tih takah hma khawsang aṭang tawhin hruaitu, player lar leh team captain etc dinhmun hi chu India hmunpui Mumbai, Bangalore, Delhi tih vel chhul chhuak mi tan lo chuan beisei chi a ni ngai meuh lo. 

Kum 1983-ah Haryana thingtlang khaw chhuak Kapil Dev-a ang maiin, 2011 kum a lo inher chhuah chuan, Ranchi khaw daifema sei lian, cricket larna ram pawh ni lo, Jharkhand chhul chhuak Mahendra Singh Dhoni a koah bawk India mipui maktaduai chuang innghahna chu a tla leh ta.

Cricket pathian an tih mai, Sachin Tendulkar tan World Cup tawpna a ni a, ṭum nga a lo inlan tawhah champion ni reng a la hmu lo. Sachin-a tan chuan World Cup hi a nomawi dahkhawmmna chhuara la inhung lo awmchhun a tih theih a, a ṭum ruk inlannaah a chawi a nih loh chuan a cricket career-ah ser lian tak a awm dawn.

Kum 1987 leh 1996 khan a thlengtu ram ni chunga India mipuite beiseina tham ral leh  mittui tlak tawhna te hre rengin, beiseina sang tak nen 2011 World Cup chu Dhoni leh a naute chuan an han hmachhawn a, a khelh lah an khel ṭha. Hemi ṭum hian Yuvraj Singh a khel ṭha em em a, cancer vei tih a in hre lo, India team inghahna niin man of the series-a thlan a ni hial.

Vanglaini Silly Point zawhna chhangin Yuvraj Singh chuan, "Team ang khan kan khel ṭha em em a, champion tum khan kan khel tawp mai a ni. Amaherawhchu, match khat te te bak kan thlir lova, final kan khelh pawh khan kan inkhelh chhung zawng khan player pakhat mah khan kan chak loh an ring lo. 

"Tin, a mimal takin inkhelh zawh te khan ka luak bawrh bawrh ṭhin a, chuap cancer ka lo nei reng kha niin, khati chunga Best Player chawimawina dawng theia team tana ka thawh ve avang khan tun hnu hian ka ngaihlu zual telh telh. Team pumpui, support staff leh BCCI official bakah, India mipui ṭan hona rah a ni a. Lang lo lama min fuihtu, kan rilru tipaukhauhtu Mike Horn a ka fak lo thei lo bawk" a ti.

Ṭau thla tahrik 2, 2011 zanah Mumbai, Wankhede Stadium-ah entu mipui sing li chuang an pung khawm a, TV kaltlangin khawvel hmun hrang hrang aṭangin mi tluklehdingawn chuangin an thlir bawk. 

Sri Lanka-in bat hmasain run 274/6 an siam a, India opener Virender Sehwag-a'n run a siam lo a, Sachin pawhin run 18 chauh a siam. Gautam Gambhir-a'n run 98 siamin Virat Kohli-a'n run 35 siam bawk mah se India-in chhanchhuaktu an mamawh.

Captain Cool Mahendra Singh Dhoni a rawn pen chhuak a, ball 79-ah run 91 a siam a, a dinpuitu Yuvraj Singh-a'n a thlawp ṭha bawk. Mumbai zan boruak rip tak karah Dhoni hian India champion nemngheh nan stadium bang deng dawpin six a rawn hlap. 

Sachin Tendulkar-a mittui a tla nge Tihar lung ina tangte lawm avanga inkuah chawn chawn nge Mizoram kilkhawra Hamara Desh champion avanga zankhawtaireka lo au ve te kha, a tu  ber nge lawmna tehfung aṭangin sang ber ni ang tih ka hre hauh lo. 

Amaherawhchu, cricket hian India ram hi a ti pumkhat ṭhin tia an sawi ṭhin chu, thu mai ni loin a takin he thuziaktu hian ka chharchhuah phah a ni.