Arsenal vs City - champion tum ngam pahnih!

Premier League 2021-22 season-ah khan Arsenal-in champion Manchester City an phak lohna chu point 24 ngawt a ni a, Mikel Arteta enkawl Arsenal hi City tan hlauhawm an ni pha lo a, mut titui lo an ni phak lo a ni ber.

Chuvang chu a ni mahna, Arsenal-in pound maktaduai 90 hum chunga striker Gabriel Jesus leh left back Oleksandr Zinchenko lei dila an dawr khan phal takin an lo pe a, City hian Arsenal hnena player hralh hi an tan a pawina an hre lo.

Nipui lai khan Arsenal hian City hi an fullback mamawh loh João Cancelo lei dilin an va bih leh dek dek a, an chhanna erawh a dang ta - 'Aih' tih a ni a, man man zawka Gunners-a Cancelo kaltir ai chuan Barcelona-a loan-a chhuahtir an pawi ti lo zawk!

Chumiin a hrilhfiah chu City hian season hmasaa an elpui ber Arsenal hi an 'tiatpui' niah an ngai a, el tham an ni tih an hai lo - hmelma thuam chaktu nih an duh tawh lo. Pathianni zan dar 9:00-ah Gunners-in Community Shield-a an hneh City an mikhual dawn.

City an pawp

Manchester City-in an league match hmasa parukah hnehna an chang vek a, mi tam zawkin Pep Guardiola enkawl team hian nomawi an chawi leh mai dawn niah an ngai hman - mahse, October a her chhuah meuh chuan he ngaihdan hi a dang leh tawh.

City-in League Cup-ah rin loh takin Newcastle United an ngam lo a, league-ah Wolverhampton Wanderers chuan hnehin, tun season-a a vawi khat nan an tlawm ve bawk - a tawi zawngin sawi ila, City an tlu a, hneh theih an ni tih khawvelin a hre thar.

Season hmasa treble champion hi season hmasa an chet ṭhatnain a uai rit tel ang tih a chiang a, season dang zawng aiin pressure an nei ngah tel bawk. Chutianga an talbuai lai tak chuan Arsenal an mikhual dawn.

City hian an thiampuipa Kevin de Bruyne chu hliam vangin an la chhawr thei lo reng a, hrem vangin Rodri a la inlan thei lo bawk - Rodri aiawh zo an nei em? tih hi zawhna langsar a ni a, Arsenal tan tun hi City tum châkawm vanglai tak a ni!

Mahse...

A buaithlak lai chu Arsenal an dam kim bik lo hi a ni a, he thu buatsaih a nih lai hian an thiampuipa Bukayo Saka inlan theih dawn leh dawn loh a chiang lo - Saka tel lo chuan Arsenal tlarhma an bil sawt ang, tihah hian zep tur a awm lo.

Saka hi a inhliam chungin England squad-ah telh a ni a, Three Lions boss Gareth Southgate chuan, "Arsenal lamin a dinhmun an la thlithlai vang a ni," tiin international break-a Saka chhawr hman a beisei.

Arsenal hian Saka an chhawr thei lo a nih chuan Gabriel Martinelli la inhliam bawk nen, Gabriel Jesus, Fabio Vieira leh Eddie Nketiah te an tlar a ngai dawn tihna a ni a, City tlarhnung su hawng turin an ṭha tawk ang em, tih chu kan hre thuai dawn.

Chutihrual chuan Arsenal hian an match hnuhnung berah hneh ngei tura ngaih RC Lens chu 2-1 in an ngam lo a, Champions League lam result hian Gunners hi a nghawng na lo ang tih a sawi theih loh - City hian khualmualah RB Leipzig chu 3-1 in an hneh thung.

Khawiah nge Haaland?

Erling Haaland-a goal khung hi thuthar a ni lo a, a khung loh hian sawi a hlawh zawk - season hmasaa goal 52 khungtu striker hian match hnih a zawnin goal a khung ta lo a, zaninah Arsenal-in dah ṭhat dan an ngaihtuah ang.

Chutihrual chuan City hian Julian Alvarez an nei tel tih hriat a ṭha a, Argentine striker hian tun season-ah goal ruk leh assist panga a nei tawh - Bernardo Silva leh John Stones an dam ta bawk a, City tan chuan chanchin lawmawm a ni.

Arsenal hi chak lo zo chiah ni mah se an team boruak a ṭha tih a chiang a, team chhungkuaah inlungrualna hmuh tur a awm - Bournemouth an sawp ṭuma Gunners a pan hnua pet goal harsat Kai Havertz tana penalty an kian khan team boruak a hrilhfiah.

Gunners hian midfield-ah Declan Rice leh Martin Ødegaard an nei tih hriat tel a ṭha a, season hmasaa Arsenal ai khan an ṭha tawh zawk. Chutihrual chuan Arsenal hian Pep Guardiola enkawl City hi league-ah an la hneh ngai lo!