October 28 aṭangin I League

Mizo club Aizawl FC telna I League chu October 28, Inrinni aṭangin khelh ṭan a ni dawn. Aizawl FC hian home match khelh nan RG Stadium an hmang a, I League khelhna tura a ṭhat tawk loh avangin 'artificial turf' phah ṭhat a ni dawn.

Aizawl FC hian October 29, Pathianniah Mohammedan Sporting Club an hmachhawn dawn a, Kolkata-ah season bul an ṭan ang. Mizo club-in an mual RG Stadium-a an khelhna hmasa tur chu November 11, Inrinni a ni dawn a, artificial turf thar pawh peih a ni tawh ang.

Mizo club hian Dutch coach Erol Akbay leh assistant coach B. Malsawmtluanga hoin I League atan inbuatsaihna ngawrh takin an nei. Chutihrualin tualchhung football season an khelh ṭanna a rei tawh bakah I League khelh hun tur a la hlat deuh avangin player-te ni thum chhung chu chhungte bula awmna hun an pe a, training erawh tunkarah an chhunzawm lehnghal ang.

Aizawl FC hian nimin khan chawlh lailawk hma training hnuhnung berah Santosh Trophy-a Mizoram aiawh tur nen friendly match an khel a, 1-1 in an inhnehtawk.

Tun season I League-ah hian team 13 an awm dawn a, Aizawl FC bakah Churchill Brothers, Delhi FC, Gokulam Kerala, Inter Kashi, Mohammedan SC, Namdhari, Neroca, Rajasthan United, Real Kashmir, Shillong Lajong, Sreenidi Deccan leh Trau te an ni ang.

Delhi FC leh Shillong Lajong te hi I League khel turin an inpettling a, Inter Kashi leh Namdhari te hi an inlei tling thung.

Ruahman dan chuan I League hi nakkum April-a zawh tur a ni a, fixtures chhuak chin hi phase 1 niin kuminah inelna chanve hi zawh tum a ni.