Copa del Rey Sevilla an chak; final-a intum tur a chiang tawh?

Ningani zan khan Copa del Rey semifinal hnuhnung zawk khelh a ni a, Sevilla-in an mikhual Celta de Vigo 4-0 in an sawp.

Barcelona-in semifinal hmasa zawkah Valencia chu 7-0 in an sawp tawh a, semifinal second leg la khelh leh tur ni mah se team pahnih chakna zat ngaihtuahin Barca leh Sevilla hi final lut tawh ang hiala ngaih theih an ni.

Inkhel chu

Ramon Sanchez Pizjuan Stadium-a inkhelah hian goal kan hmu lawk lo a, inkhel ṭan tir lam thlir chuan Sevilla-in goal li an thun hi a rinawm loh.

Inkhel ṭan aṭanga minute 28-naah Sevilla in penalty an hlawh chhuak a, a pet tur-in Kevin Gameiro a lo pen chhuak. Mahse, French winger hian goal khungna hun ṭha a bawhpelh a, a penalty pet chu Spanish keeper Ruben Blanco-a'n ṭha takin a lo dang.

Mahse, goal khung loin Sevilla an awm rei lo. First half chawhnu lam aṭangin mualneitu team hian an zia an chhuah ṭan a, minute 45-naah Adil Rami chuan an hma-hruaina goal a tauh lut.

Second half-ah Sevilla-in inkhel an thunun chhunzawm a, penalty a pet goal loh hnuah Kevin Gameiro-a'n goal khung a thiam tih a lantir a, kum 28-a upa winger hian goal hnih khungin mikhual team an hawihai hle.

Sevilla-in an la duhtawk mai lo a, minute 87-naah Michael Krohn Dehli chuan goal khat khung ve lehin kum 2010 hnua a vawi khat nana Spanish Cup final khelh an beiseina chu a chhem nung.

Unai Emery-a naute hi Copa del Rey match sarih an hmachhawn tawhah an la chak vek a, tun season Spanish Cup-a inkhel an hmachhawn tawha chak result hlawh chhuak vek thei awmchhun an ni.

Inkhel Thlirna

Inkhel pumpui thlirin Sevilla-in ball an chang tlem zawk. Goal-ah vawi 17 zet petin goal zawnah vawi sarih an pet a, vawi li an pet lut.

Celta de Vigo-in 54% ball changin ball chang tam zawk ni mah se goal hmaah an hriam tawk lo a, vawi 10 goal shot an neihah vawi thum chiah goal zawnah an pet a, goal an khung lo.

Hmabak

Copa del Rey semifinal second leg hi karlehah khelh leh a ni dawn a, Valencia-in 7-0 a an hneh loh hnu Barcelona an mikhual ang a, Celta Vigo khelmualah Sevilla an lenglut ve thung ang. Valencia leh Celta Vigo tan Spanish Cup final lut turin thil mak thlen tir a ṭul tawh dawn.