Chhinga Veng-in Champhai lehthal; Kolasib chak

Mizoram Premier League Season 5 Qualifier-ah Chhinga Veng FC an kal zel a, point ruk hmu tawhin MPL thlen nan point khat chauh an mamawh tawh. Project FC Kolasib-in Ramhlun North hnehin MPL beiseina an nei zel.

Nimin chawhma Lammuala inkhelah Champhai United-in David Lalnunmawia leh Zonunsanga te goal hmangin first half-ah hma hruai zet mah se second half-ah Chhinga Vengin Lalrinhlua, Vanlallawma leh Lalhmunsiama te goal hmangin an lehthal. Minute 80-naah Chhinga Veng defender Hmingthanmawia hnawhchhuah a ni a, Champhai United-in player pakhata an tamna an hman ṭang--
kai thei loh avangin Aizawl DFA first division champion 3-2 in an chak.

Chhinga Veng coach H. Lalremruata chuan, "First half-ah player kan rem fuh tawk lo a, halftime-ah player-te kan fuih ṭha a, kan khelh dan kan thlak a, kan vannei tel bawk. MPL khel turin kan dinhmun a ṭha a, amaherawhchu engmah chiang a la awm lo. Ramhlun North lakah fimkhur taka kan khelh a ṭul ang," tiin inchhuang thei an la nih loh thu a sawi.

MPL5 Qualifier inkhel hnuhnung zawkah Project Veng FC-in minute 30-naa C. Lalnuntluanga freekick mawi tak hmangin Ramhlun North an hneh a, Kolasib club tan MPL kawng a la inhawng zel. Chanmari hlui C. Tluanga hian Chhinga Veng an hmachhawn ṭumin freekick aṭangin a khung tawh bawk.

Tu nge khel dawn?

Chhinga Vengin an match hnuhnung bera Ramhlun North laka point an hlawhchhuah chuan MPL5 khel turin an tling ang. Chutihrualin club dang pathum Ramhlun North, Project Veng leh Champhai United ten MPL5 an la khel thei vek a, Champhai United erawh vawi hnih an chak tawh loh avangin MPL Playoff aṭanga inpet tlin chiah a theih tawh.

MPL-ah goal difference aiin head to head dah pawimawh a ni a, hei vang hian Ramhlun North-in Chhinga Veng an la zuan khum thei a; Ramhlun North an chak a nih chuan goal difference hmangin Kolasib club hi a chung berah an la awm thei bawk. Qualifier match hnuhnung ber hi February 9-a khelh tur a ni a, a pawimawh tawh avangin a hmuhnawm ngei ang.

Inkhel Thlirna Tawi

Chhinga Veng 3-2 Champhai

CVFC : Lalrinhlua 63'; Vanlallawma 68'; Lalhmunsiama 74'

CUFC : David Lalnunmawia 28';

Zonunsanga 39'

Ramhlun North 0 - 1 Project Veng, Kolasib

PVFC : C. Lalnuntluanga 30'