Kolkata-ah Aizawl FC chak lo

Bharasat Stadium-ah Aizawl FC-in point hmuh ngei tumin tlarhnungah player tam zawk dah mah se East Bengal lakah an ṭang tluan thei lo. Red and Gold Brigade-in Bikash Jairu leh player thar Bernard Mendy hmangin Mizoram Premier League champion 2-0 in an hneh.

East Bengal-in inkhel an thunun a, goal hnih aia tam khung thei dinhmun-ah an ding. Chutihrualin nimin tlai inkhelah Bengali defender Arnab Mondal chu hero of the match-ah thlan a ni a, hei hian Kolkata club lian lakah Aizawl FC an zahpuiawm lo tih a nemnghet.

Spanish coach Manuel Retamero-a'n Aizawl FC a enkawl hnua a vawi khatna atan defender panga a chhawr a, Nigerian defender Emma Chigozie chu tlarhnung tikhawng tura dah belh a ni. East Bengal lamin player thar Mendy chu starting eleven-ah an dah lut a, French player hi midfield-ah chhawr a ni.

Inkhelh ṭantirh lamah team pahnih an intluk tawk a, field chhunga player langsar ber chu Mendy niin Sikkimese winger Jairu a khel ṭha viau bawk. Aizawl FC keeper Soram Poirei-a'n goal venhim hna a thawk ṭha a, Nigerian striker Ranti Martins finishing a ṭha tawk lo bawk. MPL club pawhin goal khung theihna tur an nei ve tho a, Japanese midfielder Yuta Kinowaki-a'n goal khung a harsat a, East Bengal defender tana hnawksak ber Alfred Kemah Jaryan-a'n goalkeeper Luis Barreto a tibuai pha lo bawk.

Second half-ah East Bengal goal bawh a na sawt a, Jairu-a'n chance ṭha a tauh luh loh hnuah Aizawl FC tlarhnung an insiam ṭha lo a, India international midfielder hian minute 72-naah an tauh lut. MPL club an buai chhunzawm a, minute hnih hnuah box chhunga vengtu nei lo Mendy-a'n goal hnihna a khung.

Aizawl FC-in goal khung tumin Albert Zohmingmawia leh Brandon VL Remdika te an luhtir a, inkhel kalhmang an thlak pha tawh lo. Defensive game aṭanga attacking game a inthlak thut an nih avangin Aizawl FC tlarhnung a pherh a, Ranti leh Mendy te chance ṭha hlah zarah goal hnih chiah an chhuah.

Mizoram club-in match ruk an khelh tawh aṭangin point li an hlawh chhuak a, February 13 hian Rajiv Gandhi Stadium, Mualpuiah Shillong Lajong an mikhual ang.