Sterling hoin Chelsea an inlar

Chelsea chuan kawng dik an zawh ṭan ta niin a lang - England tana koh loh Raheem Sterling chuan ram tana khel tlak a nihzia khelmual chhungah lantirin, a club chu Burnley lakah 4-1 in a chakpui.

Inrinni zan Premier League inkhelah Blues tan Sterling-a'n goal khat a khung a ni satliah lo. English forward hi an goal paliah a inrawlh vek - Ameen Al-Dakhil chuan anmahni lamah a tilut a, hei bakah hian Cole Palmer leh substitute Nicolas Jackson ten an khung bawk.

Manchester City forward hlui Sterling hi Chelsea tan a khel ṭha tawk ṭhin lo a, hei vang hian Gareth Southgate pawhin tun hnaiah a ko lo. World Cup hnuah Three Lions tan a la inlan leh lo hial a ni.

England tana match 82 khel tawhtu a ni a, ram tan a ṭangkai ṭhin. Mahse, tun hnaia an koh loh chhan erawh a mak hran lo, club tan a khel ṭha a nih erawh chuan an ko chhunzawm leh maiin a rinawm.

Chelsea manager Mauricio Pochettino chuan, "Kan goal zawng zawngah Sterling a inrawlh vek, a khelh ṭhat avangin ka lawmpui bakah team pumpui kan chet ṭhat avangin ka lawm bawk, engkim kha duh angin a kal deuh vek.

"Sterling hi player tawnhriat nei ṭha a ni a, ram tana an ko lo hi a mak chu ka ti. Goal khung leh assist chauh hi ram tana khel tur thlanna chi niah ka ngai lo, ani ang tawnhriat nei ṭha hi chuan ram tan a theihna lanchhuahtirna remchang a nei zawk turah ka ngai," tiin a sawi.

Poch-a naute hian Fulham an hneh hnuah Burnley an hneh leh ta a, a zawnin league-ah an chak! International break neih zui tur niin, an lo kir leh hunah chuan Stamford Bridge-ah Arsenal an mikhual ang.