Old Trafford-a hlimna thlentu ‘Thinlunga Man United neitu McTominay’
Manchester United-in season bul an ṭan ṭha lo a, an dinhmun harsa tak belhchhah turin Brentford lakah tlawm thei dinhmunah an ding. Minute 90-naah Bees-in 1-0 in hma an la hruai a, mahse beiseina zawng zawng a bo hnuah United chhul chhuak Scott McTominay-a'n mak tak maia goal hnih rawn khungin Old Trafford-ah hlimna a thlen.
Sir Alex Ferguson-a awm loh hnuah Man United-in ngai an awh tawh lo a, amaherawhchu Scottish manager sulhnu a la mit vek lo. Fergie time tia an sawi ṭhinah ngei mai, Man United-in McTominay hmangin goal hnih an khung a, 2-1 in hnehna an chang. Erik ten Hag-a hote tan hnehna hlu bik a ni a, Man United ṭantute pawh ṭhiante zingah an nui leh thei bawk ang.
Beisei pha lo 'United'
Erik ten Hag-a'n insiamṭhat tumin player a siksawi a, an khelh danah danglam ṭhin mah se goal khung an harsat a, goal an chhuah ziah bawk. Inrinni inkhelah pawh thil thlen dan a la ngai reng.
Man United-in Harry Maguire leh Jonny Evans te bul an ṭantir a, mual sira awm pawh Victor Lindelof leh Diogo Dalot te an ni. Chutihrualin tlarhnung ti khawng turin Casemiro leh Sofyan Amrabat te an awm.
Old Trafford-ah Man United inkhel nung ṭha nghal viau mah se Brentford tlarhnung an ṭhiat thei lo. UCL-a goal khung thei Rasmus Hojlund-a'n Premier League-ah goal khung a harsat chhunzawm zel.
Tlarhnung lam pawh a phui ṭha lo. Lindelof leh Casemiro ten an hna an thawh ṭhat loh avangin Mathias Jensen-a'n minute 26-naah Bees hmahruaina goal a khung.
Rashford hmangin United-in chance nei ve bawk mah se Bees-in goal khung belhna hun ṭha an nei. Bryan Mbeumo leh Neal Maupay te hmangin United tlarhnung an rum ṭhaih.
A hming McTominay
Man United-in minute 87-naah Scott McTominay an luhtir a, Ten Hag-a'n a luh hmain, "Goal hnih khung rawh," tiin a hrilh. McTominay erawhin, "Mipui thawm a rin avangin ka hre ṭha thei lo a, lut la, goal khung rawh," tiin min hrilhin, ka hria, a ti thung.
An thusawi tak inhrefuh chiah lo mah se an thusawi tum erawh an inhrefuh. Chutihrualin season khat Premier League-a goal li aia tam la khung ngai lo, McTominay te an luh chuan Ten Hag pawhin tihngaihna tak a hre tawh lo niin a lang.
Minute 90-naah Bruno Fernandes goal khung chu offside vangin pawm a ni lo a, replay ennawn hnuah Anthony Martial a offside ngei avangin official thutlukna a dik.
Mahse, goal pawm loh hian United phurna a pe pha tho. Fergie Time tia an sawi ṭhinah United goal bawh a na sawt. Injury time minute thumnaah Alejandro Garnacho cross chu Dalot-a'n petin keeper Thomas Strakosha-a'n a dang. Hemi per hi McTominay-a'n player ṭha bikte tih ṭhin dan anga la thlain goal ṭha bik a khung.
Old Trafford-ah mipui thawm a ring a, beiseina a rawn pian tak avangin chakna goal khung tumin an nawr na lehzual. Martial-a'n hun ṭha a bawhpelh. Minute ruk pek belh a zo a, Fernandes-a freekick chu Harry Maguire-a'n tauh kangin McTominay-a'n um lutin ṭha zetin a tauh goal.
Chakna goal khungtu chu nipui bazara hralh an tum McTominay a ni a, a siamsaktu pawh chhuahtir an tum tho Maguire a ni. Man United-in point thum hlu bik an hlawhchhuah avangin Ten Hag-a tan pressure a zia sawt dawn a, international break a awm avangin insiamṭhatna hun an nei bawk.
Kum 1979 hnua a vawi khat nan Old Trafford-ah Man United chu a zawna vawi thum chak lo thei dinhmunah an ding a, mahse McTominay hmangin record duhawm loh an pumpelh. Ten Hag-a'n chakna goal khungtu McTominay hi 'Thinlunga Man United neitu' tiin a fak a, United ṭantuten inkhelh leh hun an nghakhlel tawh ang.