F1 champion Verstappen

Intlansiak hmabak paruk la awm mah se Max Verstappen chu Formula 1 champion a ni fel der tawh. Red Bull driver hian Qatar Grand Prix atana 'Sprint Race' an tlan zawh hnuah point 407 a nei tling ta a, midang tan um phak theih a ni tawh lo.

Dutch tlangval hian car intlansiakna sang ber hi a thunun hneh hle. Tun season intlansiak hmasa 16 zinga 13 tehmeuhah hnehna a chang a, amah hnaih bertu chu a teammate Sergio Perez niin point 223 a nei thung.

Nizan khan Qatar Grand Prix an tlan a, hei hian an point hmuh zat chu a la tidanglam thei a, amaherawhchu driver dang tan Max-a chunga lawn theihna kawng a inhawng tawh lo a ni, intlansiak tak neih hmaa sprint race an neihah hian point an hmu ṭhin a ni.

A vawi thum nana F1 champion Verstappen chuan, "Ka tan chuan kum duhthusam leh ṭha bik a ni. Car ṭha tak min chhawpchhuah saktu Red Bull chungah ka lawm, ka tan chuan season hriatreng tawh tur a ni chiang hle," a ti.

Dutch tlangval Verstappen hi kum 26 mi chauh a la ni a, tunah chuan a zawnin season thum a chungnung ta - hmabak êng tak a nei tih sawi nawn a ngai lo a, engtianga rei nge a daih ang tih chu F1 ngainatute titi a tling.

Verstappen hian Lewis Hamilton rorelna a titawp anga sawi theih a ni. Mercedes driver Hamilton hi world champion vawi sarih a ni tawh a, champion hnem ber Michael Schumacher nen an record a intluk, khum a tumna chu Max-a hian a dansak ta ngar ngar a ni.