Tlai dar 2:00-ah New Zealand vs Netherlands

Cricket World Cup-ah vawiin tlai dar 2:00 hian New Zealand leh Netherlands te Rajiv Gandhi International Stadium, Hyderabad-ah an inkhel dawn. Black Caps-in champion lai England hnehin bul an ṭan a, Netherlands erawh Pakistan lakah an tlawm thung. Thilmak a thleng a nih ngawt lo chuan New Zealand hi chak tura ngaih an ni.

New Zealand captain Kane Williamson-a'n inhliam vangin match hmasa ber a khel lo a, chutihrualin a awm loh an la tuar lo. Black Caps lam hian Williamson hi a hahdamna hun an pek a rinawm a, Tom Latham-a'n captain hn aa chelh leh a rinawm.

India thisen kai Rachin Ravindra-a'n ball 96 lekah 123 runs a siam a, a hming hi Rahul Dravid leh Sanchin Tendulkar te hming lakkawp a ni bawk nen New Zealand opener hian tun World Cup-ah hming a chher ṭan der tawh.

Netherlands hi team nem deuh tura ngaih an ni a, chutihrualin Shaheens lakah an khel ṭha phian. Over 49-ah Pakistan batter-te an vawm hlum vek thei a, over 41 lekah 205 runs an siam bawk. Mahse, Pakistan laka tlawm Netherlands tan New Zealand hneh hi a harsa dawn.