Chawlh zai rel lo Bellingham
Real Madrid chanchin ziah chuan Jude Bellingham ziah tel zel a ngai ta a, a zuitu chu a goal khung thu a ni - Inrinni zan khan Real Madrid hian 4-0 in Osasuna an sawp a, Bellingham chuan goal hnih a khung.
English midfielder bakah hian Vinícius Junior leh Joselu te chuan goal khat ve ve an khung a, hun tawp thlenga goal dang a luh loh avangin Real hi 4-0 in an chak.
Nizan khan Real elpui ber Atletico Madrid leh Barcelona an inlan a, he thu buatsaih a nih lai hian result kan hre hman lo - team pahnih hi chak pawh ni se, Real-in table chung ber an luah chhunzawm zel ang.
Hey Jude
Real-in mikhual Osasuna lakah goal khung turin an nghah rei a ngai lo - Bellingham chuan minute kuanaah goal hmahruai a khung a, goal dang lut loin chawlhlawk hman zui ni mah se minute 54-naah a belhchhah leh bawk.
Bellingham goal hmahruai hi 'team goal' tia chhal theih a ni a, tha thawhtu Dani Carvajal leh Luka Modric te chu fak tlak an ni. A goal hnihna hi Federico Valverde nen ṭha zeta a in one-two hnua keeper Sergio Herrera kap kara a khung a ni.
Kum 20 mi midfielder hian tun season-ah Real tan match 10 khel tawhin goal 10 a khung a, assist vawi thum a nei bawk. Real coach Carlo Ancelotti chuan, "A tlangnel hma a, club leh fan-te pawh ani kan chang thei hi kan vannei - a puitlinna hian kum 20 chauh a la ni tih min theihnghilh tir ṭhin," tiin Bellingham a fak.
A belhchhahtu
Bellingham-a'n goal hnih a khung hnuah Real tan Vinicius Junior inlar ve lehin, Real goal thumna a khung a, Joselu chuan a belhchhah leh bawk - kum 33 mi Joselu hian penalty a hlah thung.
Real boss Ancelotti chuan, "Kan khel ṭha takzet a, Aurelien Tchouameni khan centre back-ah hna a thawk ṭha hle. Kan nghet a, tlarhnung kan veng ṭha. Atletico laka kan tlawm hnuah khan hma kan sawn nasa a, sawiselna nasa tak kan tawh vang a ni tih ka hria - min seltute chungah lawmthu ka sawi a ni," a ti.
Madrid khaw club hian hliam vangin centre back Eder Militao, David Alaba leh Nacho Fernandez an chhawr thei lo mek a, Osasuna lakah hian defensive midfielder Aurelien Tchouameni chu Antonio Rudiger nen tlarhnung laiah an inkawp a ni.