Union Berlin lakah Dortmund chungnung hret

September 7, Inrinni khan Germany aṭanga UCL khel pha pahnih Borussia Dortmund leh Union Berlin te an inkhel a, mualneitu Dortmund 4-2 in an chak. Julian Nagelsmann-a'n United States-a Germany aiawh zin tura a koh forward pahnih Kevin Behrens (Berlin) leh Niclas Fullkrug (Dortmund) te an inlan ve ve a, anni pahnih hian en bik an hlawh.

Kum 32 mi Behrens hi upat hnua lar (late bloomer) a ni a, Berlin-in nipui bazarah David Datro Fofana (Chelsea) leh Kevin Volland (Monaco) te an lalut chungin rinrawl a pha. Nagelsmann-a'n Germany tana khel tura a koh chhan a chiang mai awm e.

Signal Iduna Park-ah pawh Behrens-a'n a thiam thil a pholang a, ṭan deuh chiahah crossbar a pet per nghal. Mahse, Fullkrug-a'n Dortmund hmaruaina a khung ta zawk.

Berlin an insiamrem a, Robin Gosens hmangin minute kuanaah siphurh an sut. Mikhual tema an vanduai a, Alex Král-a ball tauh luh ṭha zet chu offside vangin pawm a ni lo. Mahse, a hnuah VAR hmangin Dortmund-in penalty an hmu a, Italian defender Leonardo Bonucci-a'n minute 31-naah Berlin tana a goal hmasa ber khung nan a hmang.

Second half-ah Dortmund an insiamrem a, minute 49-naah Nico Schlotterbeck-a'n kawh zetin siphurh a sut. Minute 54-naah Marco Reus-a ball pass ṭha chu Julian Brandt-a'n cool zetin a khung. Nuam sa zawka Dortmund chak theih nan Julian Ryerson-a'n a khung leh bawk. Sebastian Haller pawhin a khung belhah a inngai a, VAR hmangin pawm a ni ta lo - Dortmund 4-2 in an chak.