Mohun Bagan an la chak vek

Indian Super League-a match thum an khelh tawhah Mohun Bagan an la chak vek - Kolkata club hian Inrinni zan khan Chennaiyin chu khualmualah an lenchilh a, South Indian club hi 3-1 in an hneh.

Bagan tan Dimitri Petratos, Jason Cummings leh Manvir Singh ten goal khat ṭheuh an khung a, Chennai club tan Rafael Crivellaro chuan goal khat khung ve mah se awmzia a nei phak lo - Chennaiyin hi match thum an khelh tawhah an la tlawm vek!

Inrinni zan khan inkhel hmasa zawkah FC Goa leh Odisha FC te 2-2 in an ṭin mai dawn niin a lang hman a, mahse, hun pek belh minute ruknaa Jay Gupta goal hmangin Goan club an chak.

Mikhual team Odisha hian Mourtada Fall hmangin goal hmahruai an khung a, mahse, Goa-in Noah Sadaoui goal hnih hmangin an chhanglet - si phurh sutna zawk hi penalty aṭanga a chhuih luh a ni.

Mahse, minute 81-naah Fall chuan Odisha tan si phurh a sut leh a, team pahnih hian point an insem mai a rinawm hman. Mahse, Jay Gupta chuan mahni muala chak loh an duh lo tih pholangin hun pek belhah chakna goal a khung a, 3-2 in an chak.

Odisha tana Mourtada Fall goal khung hmasa zawk chu K. Lalṭhathanga (Puitea) siamsak a ni a, Jerry Mawihmingthanga leh Isak Vanlalruatfela ten chance nei bawk mah se an chhawr lo - Jerry Lalrinzuala chuan inkhel bul ṭan bawkin, Laldinliana Renthlei chu bench aṭanga luhtir a ni.

Zirtawpni zan khan ISL kai thar Punjab FC chuan NorthEast United an mikhual a, 1-1 in an inhnehtawk. Highlander tan Romain Philippoteaux chuan penalty khung lo mah se, Parthib Gogoi-a'n khung zuiin hma an hruai a, goal mawi bik a ni.

Highlander tan tun season league match thum a khelha goal thum a khungna a ni chiah a, match thum an khelh tawhah goal a la khung vek. Mahse, I League champion Punjab tan Melroy Melwin Assisi chuan si phurh a sut a, ISL-ah a vawi khat nan Punjab-in point an hlawh chhuak.