World Cup record thar siamtu South Africa

South Africa chuan October 7, Inrinni khan Arun Jaitley Stadium, Delhi-ah Sri Lanka an hmachhawn a, 428 runs vaw chhuakin 102 runs-in an chak. Cricket World Cup history-ah Proteas hi match khata run vaw chhuak hnem ber an ni.

World Cup inkhel dangah October 6, Zirtawpni khan Pakistan-in Netherlands an hneh a; October 7, Inrinni inkhelah Bangladesh-in Afghanistan an hneh ve bawk. Inelnaah hian ram 10 an tel a, vawi khat ṭheuh an inkhelh chhuah hnuah a sang paliin semifinal an lut ang.

Football-a goal a hmuhnawm ang bawkin cricket-ah chuan run tam hi a hmuhnawm a, South Africa-in cricket hmuhnawm an chhawp chhuak. Arun Jaitley Stadium-ah captain Temba Bavuma-a'n run riat chauh siam mah se player pathum Rassie van der Dussen (108), Aiden Markram (106) leh Quinton de Kock (100) ten century an siam.

Opener De Kock hian century siam turin 84 ball chauh a mamawh a, Van der Dussen-a'n 108 runs siam turin ball 110 a mamawh thung. Sri Lanka bowler-ten mangchhia an tawng a, Markram che ṭha lehzual. Markram hian ball 54 lekah 106 runs a siam a, four vawi 14 zet vaw chhuakin six pawh vawi thum a vua.

South Africa hian 428 runs tehmeuh an siam avangin Sri Lanka tan beisei a bo a, Asia Cup-a mualpho Lions hian chak ngei tumin target um mah se 44.5 over-ah 326 runs siamin an thi fai vek. Sri Lanka hian semifinal luh an duh a nih chuan an insiamṭhat ran a pawimawh dawn a ni.