Kum dik zawka khelh theih nan ruahmanna siam

All India Football Federation hnuaia Medical Committee chuan October 6, Zirtawpni khan video conferencing hmangin meeting an nei a, kum bithliah inelnaa kum dik zawka player-ten an khelh theih nan ruahmanna an siam.

Medical committee chuan kum naupang zawkte kum endik nan chuan Tanner-Whitehouse3 (TW3) chu ṭha berah an ngai a, under 16 category hnuai lam kum bithliah inelnaa player te kum finfiah nan TW3 hi hman a ni ang. TW3 hmang hian taksa ruh sa khat dah a en theih a, hei hian kum upat zawng finfiah nana ṭha ber turah an ngai.

Under 16 leh a chung lam kum bithliah inelnaah chuan Magnetic Resonance Imaging (MRI) hman a ni thung dawn a ni.