Arsenal lakah Man City an TLAWM

Premier League champion tuma inel pahnih inkhelah Arsenal chuan nomawi kawl mektu Manchester City chu 1-0 in an hneh, goal awmchhun hi Gabriel Martinelli-a'n hun tawp dawna a khung a ni.

Mikel Arteta-a'n a vawi khat nan EPL-ah ngei mai amah chher chhuaktu Pep Guardiola a ngam ta a, season hmasa lama 'Champion teuh' an nihna ringawtah an duhtawk dawn ta lo niin a lang, tunah chuan 'Champion' an tumruh zual ang.

Gunners hian tun season league match vawi riat an khelh tawhah tlawm an la nei lo, point 20 hmuin anmahni ang bawka la tlawm lo Tottenham Hotspur nen an point a inzat - Citizens aiin point hnihin an sang mek.

Inbeihna chu

Arsenal leh Manchetser City inbeihna hi khelmual chhungah chauh a ni lo a, nipui bazar lai aṭang khan a inṭan daih tawh. Club pahnih hian na takin Declan Rice an inchuh a nih kha, a tawpah Rice-a tana sum hmang huai zawk North London club lamin an chang.

England international midfielder hi mual laia inkhel khaikhawmtu pawimawh a ni a, an forward ṭha Bukayo Saka a inlan theih loh avangin player siksawi an ngai - Rice kiangah hian tawnhriat ngah Jorginho a ding ve bawk.

Kevin de Bruyne a inhliam bakah Rodri chu hrem a ni a, lak thar Mateo Kovacic leh Bernardo Silva te bulah kum 18 mi Rico Lewis dah a ni. Manager pahnih hi player an nih laia midfielder an ni a, coach an nih hnuah pawh midfield hi an inbeihna bulpui ber a ni.

A laiah chuan

Rice leh Jorginho te hmaah Martin Odegaard a che vel a, ani dang chat tur hian Kovacic a thawkrim hle. Chelsea midfielder hlui hian Odegaard hi chiang angreng takin a tlawh, red card tur niin lang mah se VAR hman a nih hnuah yellow card pek a ni.

Croatian midfielder Kovacic hian a hnuah Rice a tlawh leh a, mahse referee Martin Oliver-a'n a hrem lo. Gunners lamin midfield an thunun tial tial a, kawng hrang hrangin nawr viau mah se goal erawh an khung hleithei bik lo.

Man City tan Erling Haaland a che thei lo a, goal khung tura pet pawh a nei lo! William Saliba leh Gabriel ten an chepral - Norway international hian Julian Alvarez tan siamsak zauh mah se Argentine forward hian goal chungah a pet chhuak luah.

A tawpah Gabi

Malpui hliam vangin a chawl a, amah enkawltu lam chuan la inkhel rih lo turin an duh - mahse, rilru huaisen leh inkhelh reng duh Martinelli kha a ni miau a, player thlak ngai an awm chiah chuan tlan lut turin a lo inpeih sa thlap tawh.

Martinelli chauh a ni lo, bench aṭanga lut Thomas Partey-a'n amah ang bawka substitute Takehiro Tomiyasu-a tauh thlak turin a vawrh lut a, ball lo dawngtu Kai Havertz leh a khung zuitu Martinelli te pawh substitute vek an ni! Arsenal squad a chhah ve ta tih nemnghehna a ni nghal.

Goal khung thiam leh a thun khawl neitu Man City lamin Arsenal tlarhnung an su hawng thei lo a, target zawnah vawi khat chiah an pet theih avangin an tan Emirates Stadium-a inkhelh a awlsam lo tih a hriat a, a hma aia ṭha zawkin thawh leh an tum ang.

Ngaihlai Rodri

Nottingham Forest nen an inkhelh ṭumin Manchester City midfielder Rodri chu hnawhchhuah a ni a, match thum inkhel thei lo tura hrem a ni. Hrem a tawh avang hian EPL-ah Wolves leh Arsenal an hmachhawn thei lo.

Champions League-ah erawh hrem a ni lo a, khualmualah RB Leipzig an hneh. Mahse, EPL match pahnih bakah League Cup-ah (Newcastle United) a inlan thei lo a, heng match pathumah hian Man City an tlawm vek.

Captain Ilkay Gundogan a chhuak a, an neih ṭhat De Bruyne a hliam bawk si - a pawimawh bik Rodri a inhliam zet chu Guardiola leh a naute an che hleithei lo. International break a zo ang a, an lo kir leha Brighton an tum hunah a inlan thei tawh ang.

Buaina tenau a chhuak

Inkhelh banah Kyle Walker leh Erling Haaland te chu Arsenal set-piece coach Nicolas Jover hoin an buai deuh laih. Jover hi Man City tana hnathawk tawh ṭhin a ni a, mahse tunah chuan Mikel Arteta nen Arsenal tan an bei mek.

City manager Guardiola chuan, "Thil thleng kha ka hria, mahse sawi zui tur ka nei lo. Arsenal lam pawhin an hria," a ti a, a hnathawhpui ni ṭhin leh tuna a player enkawl laite inkara buaina chu chanchinbu mite hmaah a sawi duh lo.

Inkhelh banah player leh club tana hnathawktu hrang hrangte an inchibai a, hetihlai hian buaina hi a chhuak. Mual sira lo awm Bukayo Saka chuan Jover hi a pawt hrang a, player dang pawhin an rawn ṭhelh bawk a ni.

Saka a damlo

Premier League season hmasa match zawng zawng kheltu, tun season kal laiah pawh inlan char char Bukayo Saka chuan malpui hliam vangin Manchester City a hmachhawn thei lo a, Arsenal forward hi England tana koh ni mah se a inlan a rinawm ta lo.

Mikel Arteta chuan, "Tunah chuan inkhel thei dinhmunah a ding lo, training pawh a la nei thei lo," tiin a player chungchang a sawi. Arteta kaihhruaina hnuaiah Saka hian a zawnin match 87 a khel a, a record duhawm tak hi hliam vangin a tawp.

Man City chungchang sawi zuiin Arteta chuan, "Hun rei tak chhung kan hneh theih loh an ni a, a tawrh hunlai kha awm mah se tunah chuan lawm hun kan thleng ve leh ta," a ti. International break zawh hunah harh thar Chelsea an tlawh chhunzawm ang.