Apuia'n goal a khung

Pathianni zan Indian Super League inkhel boruak 'hot' takah Mumbai City chuan 2-1 in Kerala Blasters an hneh a, Lalengmawia Ralte (Apuia) chuan Mumbai tan chakna goal a khung.

Mumbai Football Arena-a inkhelah hian Jorge Pereyra Diaz chuan first half hun pek belhah goal hmahruai a khung a, Blasters keeper Sachin Suresh-a ball man ngheh tawk loh zar a zo.

Blasters tan Danish Farooq chuan minute 57-naah Sandeep Singh-a ball cross ṭha zet chu tauh lutin, si phurh sutna goal a khung a, mikhual team an phur thar.

Mahse, minute 66-naah Apuia a inlar a, Vaivakawn tlangval hian taima taka ball um lutin, Suresh-a man phak lohin a tauh lut - Mumbai Football Arena an lam a, Apuia goal khung lawma lam zingah Bollywood actor nupa Ranbir Kapoor leh Alia Bhatt te an tel.

Apuia chuan, "Vanneihthlak takin ka khung ve leh thei hlauh a, ka lawm khawp mai. Tunah rih chuan hmun pawimawh ka la chang ve zel a, chan chhoh zel theih pawh ka la inbeisei," tiin Vanglaini a hrilh a, khelh ṭhat zel a tum.

Mualneitu Mumbai tan Lallianzuala Chhangte a inlan bawk a, Lunglei tlangval hian goal khungna chance a neih a chhawr thei lo thung - Blasters tan Freddy Lallawmawma chu bench aṭanga luhtir a ni bawk.

Mumbai khawpuia inkhelah boruak a sang a, hun tawp lamah referee-in red card pahnih a phawrh! Hun tawp hnaih lamah hian vawi hnih ngawt buaina a chhuak a, Blasters defender Miloa Drincic leh Mumbai midfielder Yoell van Nieff te chu hnawhchhuah an ni.