Kohli-a'n India a chakpui

Cricket World Cup-ah inelna thlengtu India-in sulhnu nei ṭha ber Australia hnehin bul an ṭan. Chennai-a inkhelah India bowler-te an che ṭha a, Australia-in 199 runs chauh an siam. Target awlsam niin lang mah se captain Rohit Sharma, Ishan Kishan leh Shreyas Iyer ten run khat pawh an siam lo.

Men in Blue-in wicket thum an hlohin run hnih chauh an la siam a, an talbuai hle. Mamawh hunah tak Virat Kohli a rawn inlar a, KL Rahul-a'n rawn thlawp ṭha bawkin over 41.2-ah India-in 201/4 runs an siam a, wicket rukin hnehna an chang.

Chepauk Stadium-ah run siam tam a harsa tih a lang a, Australia-in six vawi hnih chauh vawi chhuakin India-in vawi thum chauh an vaw bawk. Spinner-ten hmun pawimawh an chang a, Australia tana bat hmasa pasarih zinga paruk chu spinner-te vawm hlum an ni.

Kum 2011 aṭanga chhutin Chepauk Stadium-ah hian Australia-in ODI match 10 an khel a, chawh ruala an run siam zat chu 238 runs a ni. Hei vang hian inkhelhna hmun hi run siam tamna ni lo mah se Aussies run siam hi a tlem hret. India-in bul an ṭan ṭha lo chungin target a tlem bakah Kohli leh Rahul te chet ṭhat avangin thin phut dut awm hman mah se a tawp ṭha takin an khar.

India hian October 11, Nilaini hian Afghanistan an hmachhawn dawn a, chumi zawha an khingpui tur chu Pakistan a ni. India leh Pakistan inkhelh hun hi October 14, Inrinni a ni a, cricket ngainatuten an nghakhlel tawh hle.

Vawiin hian inkhel pahnih a awm dawn. Champion lai England tan insiamṭhatna hun ṭha a ni a, Bangladesh nen an inkhel dawn. Three Lions hi an chak zo lo a nih chuan nomawi humhim chu sawi loh, semifinal thlen phak pawh a har phah khawp ang. Tlai dar 2:00-ah Pakistan leh Sri Lanka te an inkhel dawn a, Shaheens hian kumin Asia Cup semifinal phuba lak an tum ang.