Thawh zai rel lo Liverpool!

Tottenham Hotspur lakah sawisel theih taka an tlawm hnuin Liverpool-in an result ṭha lo nghilh turin hna an thawk ṭha lo a, Pathianni zan khan an mikhualna ramah Brighton & Hove Albion nen 2-2 in an inhnehtawk.

Liverpool-in tun season-ah chin dan ṭha lo an neih an bansan theih loh a awm a, chu chu goal chhuah hmasak a ni - Brighton lakah pawh goal chhuah hmasa zawkah an ṭang a, ṭum dang aia a pawina chu goal chhuah hnuhnung zawk an ni tel bawk chu a ni.

Brighton tan hian Simon Adingra chuan goal hmahruai a khung a, Liverpool hian Mohamed Salah goal hnih hmangin an chhanglet. Reds hian hnehna an chang mai tawh dawn nia a lan laiin Lewis Dunk chuan Brighton tan si phurh a sut a, 2-2 in inkhel a tawp - Reds manager Jurgen Klopp-a'n Anfield-a kum riat a hmanna champhaah a team a chakpui zo lo.

Liverpool hian league match hnih chhung chu a zawnin hnehna an chang zo ta lo tihna a ni a, hmahruaitu Tottenham Hotspur chu match riat khelh tawhah point thumin an phak lo mek - Reds hi an chhe ta duai anga sawi erawh a la rem lo a, international break zawh, October 21-ah Merseyside derby khel turin Everton an mikhual ang.

Harsatna ngai

Liverpool hian tun season inelna hrang hrangah match 11 an khel tawh a, heng zinga match kuaah hian hnehna changin, match hnih draw an nei a, vawi khat chiah an la tlawm - chu pawh player pakua nena Spurs laka an tlawm chu a ni.

Mahse, Liverpool hian season hmasa aṭanga an buaina tawh chinfel loh an la nei a, chu chu goal an khung theih ruala goal chhuah an hrat tel hi a ni. Tun season-ah match hnih chiah goal chhuah lohna an la nei!

Heng zinga match sarih an khelh tawhah hian goal an la chhuah hmasa zel a, thawhleh chang tam zawk mah se Reds tan inenfiahna tur langsar a ni - Brighton lakah pawh minute 20-na lekah goal an chhuah hmasa.

Reds defender Virgil van Dijk chuan Alexis Mac Allister tan ball a pe a, mahse, Brighton player hlui insiamrem hmain Adingra chuan ball a lo lak khalh a, keeper tlan chhuak Alisson tana dan theih loh turin goal-ah a chhuih lut.

A ngai bawk

Liverpool tan harsatna an tawh laia rawn ding chhuak ṭhin pakhat a awm a, a hming chu Mohamed Salah a ni - Egyptian forward hi Brighton lakah pawh a team chhanhim turin a lo lang leh a, a tawpah erawh a tawk zo ta chuang lo.

Minute 40-naah Dunk-a ball pek sual zarzoin Darwin Nunez chuan Salah tan a siamsak a, nipui transfer-a Al Ittihad-in pound maktaduai 150-a leichhuah an tum forward hian Liverpool-in an hralh phal loh chhan pholangin, si phurh sutna goal a khung.

Liverpool-in an duhtawk mai lo. First half hun pek belhah Pascal Gross chuan Dominik Szoboszlai a tihtluk avangin penalty a chawi a, player inringtawk Salah chuan harsatna nei loin goal-ah a chantir.

Kum 31 mi Salah hian tun season inelna hrang hrangah match 10 khelin goal ruk a khung leh der tawh a, assist vawi li a nei bawk. Reds tan match 315-ah goal 192 a khung tling ta a, Jurgen Klopp-a hnuaiah Liverpool tan ani aia khung hnem an awm lo.

Mahse maw...

Liverpool-in hmahruaitu ni chungin chawlhlawk an hmang a, Reds ṭantuten hahdam takin an chak zui mai turah an ngai - mahse, Brighton lamin ngaihdan dang an nei a, mahni muala point hlawhchhuah loh an duh lo.

Brighton hian minute 78-naah freekick an hlawh chhuak a, Solly March-a pet aṭanga ball kal chu Dunk chuan goal-ah a chantir. Liverpool an zawi hnawk a, inelna hrang hranga match thum chhung a zawna chak zo tawh lo Brighton an lam thung.

Liverpool-in an chance neih an chhawr loh rah an seng, tiin a sawi theih. Bench aṭanga luhtir Ryan Gravenberch chuan goal ruaka khungna chance nei mah se crossbar a tihper a, a ui vawng vawng ang.

Hetihrual hian Brighton pawhin sawi tur an nei ve tho - Joao Pedro chuan uiawm takin a chance neih a chhawr thei lo a, Virgil van Dijk handball vanga an penalty beisei chu pek an ni lo bawk.