Lianzuala & Chungnunga ten Malaysia pan

Football Association of Malaysia buatsaih Merdeka Cup khel turin India squad chuan nimin khan Malaysia an pan a, Blue Tigers squad-ah hian Mumbai City forward Lallianzuala Chhangte leh East Bengal defender Lalchungnunga te chu an tel.

Merdeka Cup-ah hian India bakah inelna huaihawttu leh thlengtu Malaysia, Palestine leh Tajikistan te chu tel tur an ni. Mahse, Israel nen an buaina avangin Palestine hi an inlan theih a rinawm lo a, he thu buatsaih a nih lai hian an aiawh tur hriat a la ni lo.

Ruahman dan chuan India hian October 13, zan dar 6:30-ah Malaysia nen match an nei dawn a, team pahnih intawn hma chawhnu dar 2:00-ah Tajikistan leh Palestine chu inkhel tura tih an ni a, Palestine an inlan ta lo a nih chuan an aiawh leh Tajikistan hi inkhel mai tura ngaih an ni.

Inkhel pahniha chak zawkte hian October 17-ah final khelin, nomawi an inchuh leh ang a, hemi niah vek team chak lo pahnihten pathumna dinhmun an inchuh bawk ang.

Blue Tigers hian September international break-ah khan King's Cup khelin Iraq (2-2) leh Lebanon (1-0) hmachhawnin, chak an nei lo a, contract thar ziak Igor Stimac-a'n kut ruaka Malaysia chhuahsan a duh dawn lo.

India tan Lianzuala'n match 29 khel tawhin, goal sarih a khung tawh a, Chungnunga tan erawh thil thar a ni - East Bengal defender hian Asian Games-ah India tan khel mah se Under-23 team an ni a, King's Cup squad-ah tel mah se a inlan lo bawk. Malaysia-ah India tana a match hmasa ber khelh a beisei ang.