Silly Point : ROUND 1

ICC World Cup 2023, League Stage round kua khelh tur awma round khatna chu kan lo zo fel ta der mai. Team 10 zinga sang pali chauhin semifinal an luh dawn avangin a chhe berah vawi kua khela vawi ruk tal chak a ngai ngei ang.

Pathianni thlirletna

A hmasa lama kan lo thailan ang ngeiin, India-in an spinner pathumte an khelhtir vek a, an tisual lo teh e. Rin ai daihin Chepauk pitch ball sawt a zawiin a muang a, turn tlem a zawng a awm nghal.

Aussies kaptan Pat Cummins-a'n ṭhumvawra a vanneih hnuah vuak hmasak a thlang kha a tisual lem lo. Chennai boruak enin, thlasik rim a la nam chiah lo nen India hmar lam buaina dai a tla ve vak dawn lo tih a chiang. Over rukna vel a nih meuh kha chuan 300 runs chuang vuak chhuah theihna pitch a ni lo tih a chiang nghal bawk.

The Trinity

Ball an hlui ṭan chiah a, Kuldeep Yadav, Ravindra Jadeja leh Ravichandran Ashwin a te pathum inkawpin ball an han thuaivir ṭan atangin game a danglam ta. Bat-ah ball a rawn kal l oa, tin turn a awm nghal bawk.

A khat tawkin wicket an la reng a, Australia batsman pakhatmah khan lei rem an rap hman lo a ni ber. Jadeja tawnhriat ngah a lang a, ani hi spinner vawm kawh pawl tak a ni a, 96-98 km/hr a vawm ṭhin khan, a khelmual hriat chian IPL lama a home ground Chepauk-ah chuan 10 km/hr dawnin a pace a timuang a, Australia batsman te tan tawrh a khirh teh e.

Spinner pathumte hian an over 30 belhkhawmah dot ball 101 tehmeuh mai an vawm tawh aṭang kha chuan Australia khan 50 runs vel chuan target ṭha tak tur an pha lo (short) deuh a ni tih a sawi theih awm e.

Irhfiak leh a damdawi

Hamara Desh lah 200 runs lek um e ti lo chuan bul ṭan ṭha lo tak an ni. Run hnih lek an la vaw chhuak tihin Ishan Kishan, Rohit Sharma leh Shreyas Iyer te chu field chhunga an bat hun chhung aiin, an insiam chhung a rei zawk a, pavilion lamah an let leh der tawh.

Ishan Kishan a ball vuak tum kha thil ṭul ber a ni lo a, attacking batsman chu a ni nameuh mai, mahse run 200 lek um turin khatiang te koa luh hlima Mitchell Starc ball vawm vai nghal tum kha a athlak zia a hrechiang tawh ang.

Shubman Gill lo let hunah erawh starting 11 a chang pha tawh lo, a nih pawhin amah bak inmawhpuh tur a nei lo ang. Rohit Sharma erawh midang aiin hun hi a ngah bik emaw tih mai tur, mutthlu chunga bat ang maiin, Shreyas Iyer nen pitch muan vangin an thi hma. Iyer a ball hlap sual kha cricket ṭawngkam takin 'Time lo' diktak entirna a ni e.

Kulhpui Kohli leh Rahul

Chepauk Stadium mipui an reh ṭhiap a, batsman ṭha pathum pavilion-ah an let tawh si, chak lo thei dinhmunah an ding. Lamtluang mam leh daihlim tamnaah ni loin, bawl leh khawkrawk karah chiah hian mi ropui an rawn lang chhuak ṭhin an tih angin, Virat Kohli leh KL Rahul te 150 runs partnership kha a va hlu em.

Ni e, va vuak nghal a ngai lo a, damrei a, dinchan peih kha a ni mai. Kohli chu sawi loa leng a ni a, vawi tam India tan hun harsaah rah ṭha a chhuah tawh. KL Rahul erawh International Cricket a rawn rah tirh aṭanga 'talented mahse sakhat (consistent) lo' tih tawk fo ni a, India Selector leh kaptan Rohit Sharma ten an rin tlatna chhan chu India mipui hmuhah a hunah tak a rawn pholang.

Ni e, tun hma aṭanga player tam tak thik tur khawpa chance pek hnem deuh bik chu a ni ngei. Mahse India buaina ber no. 4/5, batting line up a, a hnungzâng ruh pawimawh tak atan chuan tun dinhmunah KL Rahul a baka rin tur hi chu an awm lem lo.

Thawk leh khatah pitch muanna pawh a reh ta vek emaw tih mai turin Kohli leh KL Rahul ten Australia laka ta inkhel kalhmang an thlak hlawk a tih theih. Kaptan Pat Cummins erawh Adam Zampa bak spinner chhawr tur a nei lo a, Glen Maxwell a part time 'off spin' ringawt pawh an team tan lunghlu a ni ta deuh ber mai awm e.

I thlirho zel ang aw

Thil pahnih khat erawh a chiang - Tournament an rei tial tial ang a, team tinte spinner an pawimawh telh telh dawn. Tin, inkhel ṭhenkhat hi 300 runs chuang vuakchhuah deuh pap pap theihna pitch a ni vek dawn lo.

A hmuhnawm dan erawh a danglam ve thung lawi si. India hmar lam inkhel turte a ni telin Chhandamtu pian champha kan hnaih avangin, thlasik dai in a tibuai nasa telh telh dawn. Amaherawhchu India chhim lam ho erawh tun dinhmunah chuan an lo buai hrih lo a nih hi.