Champion lawm nan Verstappen a chak

Formula 1 champion a nih lawm nan Max Verstappen chuan Qatar Grand Prix-ah hnehna a chang a, tun season zet chu Red Bull driver hian amah el phak a nei lo a ni satliah lo, tlema hnaih ve deuhtu pawh an awm phak lo.

Inrinni khan Qatar Grand Prix atan hian Sprint Race an tlan a, hemi ṭuma a point hmuh avangin Verstappen hi F1 champion a ni tih a chiang tawh. Pathianni zan khan intlansiak tak an nei chhunzawm, a phu ang ngeiin a chak leh ta tho a ni.

Dutch tlangval Verstappen chuan, "Team champion ni sa chungin Qatar kan pan a, a tir aṭangin kan zin boruak kha a fuh sa tawh hle. Qatar GP tlanna hmun hi a nuam êm êm a, chutihrualin khaw lum avangin a harsat chang a awm ve bawk.

"Thil nuam leh harsa pahnih inchawhpawlh kara F1 champion ka ni leh thei hi ka lawm a, kei leh kan team tan chuan chawlhkar theihnghilh ngai tawh loh tur a ni ang. Team ṭha leh ropui zinga ka tel ve thei hi ka inchhuang hle," a ti.