Bayern an chak nuamsa

Bundesliga-ah Bayern Munich chuan Pathianni zan khan Freiburg an mikhual a, 3-0 in an chak. Bavarians tan hian Kingsley Coman-a'n goal hnih khungin Leroy Sane-a'n a khung ve bawk.

Allianz Arena-ah Bayern tan Harry Kane leh Thomas Muller ten bul an ṭan a, Thomas Tuchel-a hote hi an vannei. Coman-a'n dinglam aṭanga a cross chu goal-ah a lut a, minute 12-naah 1-0 a ni.

Kane-a'n goal khungna chance ṭha a nei a, a vanneih ṭum a ni lo. England striker Kane hian hma a sial lo bawk, minute 25-naah Bayern striker hian a goal khung theihna chance ṭha chu Sane tan a pe a, Germany international hian awlsam takin a khung.

Sane hian first half tawp hmain a khung belhah a inngai a, mahse offside vangin pawm a ni lo. Bayern-in inkhel an thunun zo tho a, second half-ah pawh chance an ngah. Coman-a'n a pet goal theihna turah Mathys Tel a pe a, French rawlthar duhawm hian goal-ah chantir mah se offside vangin goal-ah an pawm lo.

Leon Goretzka pawhin woodwork a pet per a, Bayern goal bawh a na hle. Minute 85-naah Coman-a'n a khung belh a, Bayern 3-0 in an chak.