Roma leh Lukaku an kal zel

Jose Mourinho kaihhruaina hnuaiah Romelu Lukaku leh AS Roma chuan hmalam an pan mek zel. Pathianni zan Serie A inkhelah Roma hian Cagliari chu 4-1 in an hneh a, khualmualah point thum an hlawh chhuak.

Belgium international striker Lukaku hian Cagliari lakah goal hnih a khung a, ani bakah hian Houssem Aouar leh Andrea Belotti ten goal khat ve ve an khung bawk, hun tawp dawna Nahitan Nandez-a goal khungin mualneitu mualphona a hliah khuh phak lo.

Chelsea leh Inter Milan ten an kawl duh loh Lukaku hian tun hnaiah a theihna sang tak a pholang mek, inelna hrang hranga a match hnuhnung pariatah goal sarih a khung - hliam vangin Paulo Dybala chawl mah se Roma tan tlarhma lamah buaina a awm rih lo a ni.

Kum 30 mi Lukaku chuan, "Ka chungchang an sawina chi hrang hrang hi ka hre ve zel a, mahse a chhanletna ṭha ber chu ṭawngkam ni loin thil tih a ni. Nipui lai khan rim takin ka bei, chumi rah chu tunah a lang," a ti.

Pathianni zan Serie A inkhel dangah champion lai Napoli an chak lo. Italian champion hi an mikhual Fiorentina lakah 3-1 in an tlawm a, inkhel inhnehtawk takah Lazio chuan Atalanta 3-2 in an hneh bawk.